Ti Piipel nënt Yeesus wii “Kot sayne Soon” oft mools. (Yoohan 1:49) Tiise wërter, “Kot sayne Soon”, tsayche tas Kot te Kriatoer is, orer ti Kwel, fon ale leepe, un aach fon Yeesus sayn leepe. (Psalm 36:9; Apokalipsis 4:11) Ti Piipel lërnt net tas Kot Yeesus sayne Fater kewoer is soo wii ti mënxe ti eltere fon een khint wëre.

 Ti Piipel saat aach tas ti ëngele “khiner fom woere Kot” sin. (Yoop 1:6) Un aach, tas Aatam, te eyerste man, “Kot sayne soon” waar. (Lukas 3:38) Awer, wayl Yeesus waar Kot sayn eyerst kriatsyoon un te eensiche woo Kot selepst aleen kemacht hot, nënt ti Piipel tee wii Kot sayne haupste Soon.

•  Hot Yeesus im himel keleept eep tee uf ti Eyert khom is?

•  Was hot Yeesus kemacht eep tee uf ti Eyert khom is?

 Yaa. Yeesus waar een spirituaal kriatuer im himel eep tee wii een mënx uf ti Eyert kepoer is. Yeesus selepst saat: “[Ich] sin fom himel khom.” — Yoohan 6:38; 8:23.

 Kot hot Yeesus kemacht foer ale anere tinge. Kuk was ti Piipel saat iwich Yeesus:

•   “Eyer . . . is te eyerste kepoerne fon ales woo kemacht kep is.”— Koloser 1:15.

•   Tee is “te aanfang fon Kotes kriatsyoon.” — Apokalipsis 3:14.

 Yeesus hat erfiilt ti profetsii woo kexproch hot fon tëm woo te “aanfang khomt fon friier tsayte, fon lang tsayt heyer.” — Mikeyas 5:2; Matheus 2:4-6.

 Tee hat een hooch xtel im himel. In een kepeet, hot Yeesus kexproch iwich ti xtel woo tee hat eep tee uf ti Eyert khom is: “Fater, tuu mich . . . loope, mit te hërlichkheet woo ich pay teer hat, eep ti welt eksistiirt hot.” — Yoohan 17:5.

 Tee hot sayne Fater keholef ales aneres mache. Yeesus hot neewich Yeehoowa kexaft “wii een kuute aarwayter.” (Xpriiche 8:30) Iwich Yeesus, saat ti Piipel: “Torich tëm sin ale anere tinge kemacht kep, in te himele un uf te eyert.” — Koloser 1:16.

 Torich Yeesus hot Yeehoowa ales kemacht was eksistiirt. Un aach ti ëngele un te Uniwërs. (Apokalipsis 5:11) In etliche aate, khan ma ferklayche ti aat woo se mit samer kexaft hon mit een arkitëkt un een pauermayster. Te arkitëkt macht te projëkt, un te pauermayster halt te projëkt noo fer ti paueray mache.

 Tee waar tas Wort. Ti Piipel nënt Yeesus wii “tas Wort”, eep eyer uf ti Eyert khom is. (Yoohan 1:1) Tas petayt tas Yeehoowa hot torich Yeesus informatsyoone un oryentiirunge kep fer ti anere ëngele.

 Tas siit aus tas Yeehoowa als mool Yeesus kexikt hot fer uf sayn plats mit ti mënxe xpreche. Wën Kot oryentiirunge kep hot fer Aatam un Ewa im Eetem kaate, is es meechlich tas eyer tas kemacht hot torich Yeesus, “tas Wort”. (Xeenesis 2:16, 17) Un tas is meechlich tas Yeesus te engel waar woo ti israeliiter torich te tesërt kefiirt hot, un im xtant waar tas tëm sayn xtim woo ti israeliiter aan heere muste. — Eeksotus 23:20-23. a