A omen leisi Beibel e kai Yesesi „a Manpikin fu Gadu” (Yohanisi 1:49). Te Beibel kai Yesesi a „Manpikin fu Gadu” da a wani taki a Gadu meke en. Neen gi en libi leti enke ala den taa sani (Psalm 36:9; Openbaring 4:11). Beibel nai leli u taki Gadu meke Yesesi enke fa libisama e meke pikin.

 Beibel e kai den engel „manpikin fu a tuu Gadu” tu (Yopu 1:6). Beibel e soi taki Adan, a fosi libisama, a be „Gadu manpikin” (Lukasi 3:38). Ma Yesesi na a moo pelensipali manpikin fu Gadu, fu di neen na fosi sani di Gadu meke. Neen na a wan enkii sani di Gadu seefi meke.

•  Yesesi be e tan a hemel fosi a kon a goontapu?

•  San Yesesi be e du fosi a kon a goontapu?

 Eeye. Yesesi be de enke wan yeye a hemel fosi a kon enke libisama a goontapu. Yesesi seefi be taki a „komoto a hemel”.​—Yohanisi 6:38; 8:23.

 Gadu be meke Yesesi fosi a be meke den taa sani. Beibel e taki fu Yesesi taki:

•   „Neen na a fosi sani di Gadu meke.”​—Kolosesama 1:15.

•   En na „a fosi sani di Gadu meke.”​—Openbaring 3:14.

 A Yesesi na a sama di Beibel be taki „de senten kaba, senten hawten”.​—Mika 5:2; Mateyesi 2:4-6.

 A be abi gaan faantiwowtu a hemel. Na a sani ya Yesesi be taki aini wan fu den begi fi en: „Nda, gaantangi baa, gi mi a gaandi di mi be abi fosi goontapu meke.”​—Yohanisi 17:5.

 A be yeepi en Nda meke ala taa sani. Yesesi be e wooko makandaa anga Gadu. A be de wan „sama di koni fu du en wooko” (Odo 8:30). A Beibel e taki fu Yesesi taki: „Neen na a sama di Gadu teke fu meke ala taa sani a hemel anga goontapu.”​—Kolosesama 1:16.

 Gadu koboloiki Yesesi fu meke ala taa sani di a be wani meke. A yeepi Gadu meke den engel anga ala taa sani a hemel anga goontapu (Openbaring 5:11). Te i luku a fasi fa Yehofa anga Yesesi e wooko makandii, u sa teke den gei anga a gi di wan basi e gi wan wookoman wan wooko. Ai taigi en fa a wooko mu du, da a wookoman e du san a basi taigi en.

 Neen a be a Wowtu. Te Beibel e taki fu a libi fu Yesesi fosi a be kon a goontapu, da ai kai en „A Wowtu” (Yohanisi 1:1). A sani ya e soi taki Yesesi be de enke wan basiya fu Gadu di e tyai bosikopu gi den taa engel.

 Yesesi a be wan basiya fu Gadu di be e taki anga libisama a goontapu tu. Kande a Yesesi Gadu be sende fu taki anga Adan anga Efa aini a dyali fu Eden (Genesesi 2:16, 17). Kande a Yesesi a be a engel di Gadu be sende fu tii den Islayelisama aini a sabana. Kande neen den Islayelisama be mu aliki.​—Ekisodesi 23:20-23. a