Jiñi Biblia miʼ yʌl chaʼan Jesús jiñʌch «i Yalobil Dios» (Juan 1:49). Ili tʼan «i Yalobil Dios» miʼ yʌcʼ ti ñaʼtʌntel chaʼan Dios jiñʌch tsaʼ bʌ i luʼ Mele chuqui tac an yicʼot chaʼan jiñʌch muʼ bʌ i yʌcʼ cuxtʌlel, ili yom i yʌl, chaʼan Dios jiñʌch tsiʼ mele Jesús jaʼel (Salmo 36:9; Apocalipsis 4:11). Jiñi Biblia maʼañic miʼ yʌl chaʼan Dios miʼ yʌcʼ i yalobil cheʼ bajcheʼ miʼ yʌcʼ ti pañimil i yalobil juntiquil wiñic.

 Jiñi Biblia miʼ pʌs jaʼel chaʼan jiñi ángelob i yalobilobʌch jiñi i sujm bʌ Dios (Job 1:6). Cheʼ jaʼel, miʼ yʌl chaʼan jiñi ñaxam bʌ wiñic, Adán, «i yalobil Dios» (Lucas 3:38). Pero jiñi Biblia miʼ yʌl chaʼan Jesús jiñʌch ñumen ñuc bʌ i yalobil Dios, come jiñʌch jiñi ñaxam bʌ tsiʼ mele Dios.

•  ¿Tsaʼ ba chumle Jesús yaʼ ti panchan cheʼ bʌ muʼto caj i tilel ila ti Lum?

•  ¿Baqui bʌ i yeʼtel Jesús yaʼ ti panchan cheʼ bʌ muʼto caj i tilel ila ti Lum?

 Tsaʼʌch. Cheʼ bʌ Jesús muʼto caj yilan pañimil ila ti Lum juntiquilix ángel yaʼ ti panchan. Jiñʌch tsiʼ chaʼ alʌ chaʼan tsaʼ jubi tilel ti panchan (Juan 6:38; 8:23).

 Jesús jiñʌch jiñi ñaxam bʌ tsaʼ mejli ti Dios. Jiñi Biblia miʼ yʌl tiʼ tojlel Jesús:

•   Jiñʌch «jiñi ñaxam bʌ tiʼ pejtelel chuqui melbil» (Colosenses 1:15).

•   Jesús jiñʌch «jiñi ñaxam bʌ i melbal Dios» (Apocalipsis 3:14).

 Jesús tiʼ tsʼʌctesa jiñi profecía tsaʼ bʌ i yʌlʌ tiʼ tojlel juntiquil wʌn añix bʌ ti ñaxan (Miqueas 5:2; Mateo 2:4-6).

 Añʌch wen ñuc bʌ i yeʼtel yaʼ ti panchan. Tsiʼ taja ti tʼan iliyi cheʼ bʌ tiʼ sube Dios: «C Tat, ñuqʼuesañon [...] yicʼot jiñi ñuclel am bʌ c chaʼan ti ñaxan cheʼ bʌ maxto mejli jiñi pañimil» (Juan 17:5).

 Jesús tsaʼʌch i colta i Tat chaʼan miʼ mel pejtelel chuqui tac an. Jesús tsiʼ chaʼle comol eʼtel yicʼot i Tat chaʼan miʼ melob pejtelel chuqui tac am bʌ (Proverbios 8:30). Jiñi Biblia miʼ yʌl tiʼ tojlel Jesús: «Tiʼ tojlel tsaʼ mejli pejtelel jiñi yan tac bʌ am bʌ ti panchan yicʼot ti pañimil» (Colosenses 1:16).

 Dios tsiʼ cʼʌñʌ Jesús chaʼan miʼ mel pejtelel chuqui tac an. Yaʼ ochem jiñi ángelob yicʼot pejtelel chuqui am bʌ yaʼ ti universo (Apocalipsis 5:11). Cheʼ bʌ Dios yicʼot Jesús tsiʼ comol chaʼleyob eʼtel miʼ mejlel lac lajeʼ bajcheʼ juntiquil arquitecto yicʼot juntiquil jiñi xmel otot. Jiñi arquitecto miʼ melben jiñi i dibujolel jumpʼejl otot pero jiñi xmel otot jiñʌch jiñi muʼ bʌ i yoque mel.

 Jiñʌch jiñi Tʼan. Cheʼ bʌ Jesús yaʼto an ti panchan, yaʼ ti Biblia miʼ cʌjñel bajcheʼ «jiñi Tʼan» (Juan 1:1). Ili yom i yʌl chaʼan Dios tsiʼ cʼʌñʌ i yalobil chaʼan miʼ suben jiñi yambʌ ángelob chuqui tac muʼ bʌ i yʌl Dios.

 Jesús jiñʌch tsaʼ bʌ i pejca jiñi quixtañujob chaʼan miʼ subeñob chuqui yom bʌ Dios. Jehová tsiʼ cʼʌñʌ Jesús cheʼ bʌ an chuqui tiʼ sube Adán yicʼot Eva yaʼ ti pʌcʼʌbʌl Edén (Génesis 2:16, 17). Tajol Jesús jiñʌch tsaʼ bʌ i tojʼesa majlel jiñi israelitajob yaʼ ti tiquin bʌ lum, cheʼ jaʼel jiñʌch tsaʼ bʌ i cʼʌñʌ Dios chaʼan miʼ suben jiñi israelitajob chuqui yom bʌ miʼ melob (Éxodo 23:20-23). a