Na Biblia, manada beses ya llama con Jesus “Anak del Dios.” (Juan 1:49, El Nuevo Testamento na Chavacano) El expresion “Anak del Dios” ta dale mira que el Dios amo el Creador o Tuburan del todo vida, incluido el vida de Jesus. (Salmo 36:9; Revelacion 4:11) Gendeh ta enseña el Biblia que el Dios literal ya queda tata del un bata igual si paquemodo el gente ta tiene maga anak.

 El Biblia ya llama tambien con el maga angel como “maga anak del verdadero Dios.” (Job 1:6) Y el Biblia ya habla quel el primer gente, si Adan, amo un “anak de Dios.” (Lucas 3:38) Pero, ciendo si Jesus el primer creacion y el solamente con quien directa ya crea el Dios, el Biblia ta dale mira que si Jesus amo el de con todo importante Anak del Dios.

•  Ya vivi ba si Jesus na cielo antes le ya nace na tierra?

•  Cosa ya hace si Jesus antes le vene aqui na tierra?

 Si. Un espiritu creatura si Jesus na cielo antes le ya nace como un gente aqui na tierra. Si Jesus mismo ya habla: “Ya abaja yo del cielo.”—Juan 6:38; 8:23.

 Ya crea el Dios con Jesus antes le crea con el otro cosas. Acerca con Jesus, el Biblia ya habla:

•   “Ele amo el primero na entero creacion.”—Colosa 1:15.

•   Ele “el principio del maga creacion del Dios.”—Revelacion 3:14, NWT.

 Ya cumpli si Jesus con el profecia acerca con el “quien ya origina na maga tiempo de antes, estaba na maga tiempo que ya dura ya gayot.”—Miqueas 5:2; Mateo 2:4-6.

 Tiene le un alto posicion na cielo. Ya menciona le acerca con ese posicion cuando ya reza le: “Tata, dale Uste conmigo el gloria . . . igual con el gloria ya tene yo junto con Uste cuando noay pa hace el mundo.”—Juan 17:5.

 Ya ayuda le con el de suyu Tata crea con el todo otro maga cosas. Ya trabaja si Jesus junto con Dios como un “buen trabajador.” (Proverbio 8:30) Acerca con Jesus, el Biblia ya habla: “Na disuyo persona ya hace todo el maga cosa-cosa na cielo y na mundo.”—Colosa 1:16.

 Por medio con Jesus, ya crea el Dios con el otro maga cosas. Incluido na ese creacion el todo otro espiritu creatura y el fisical universo. (Revelacion 5:11) Na cuanto manera, el cooperacion entre del Dios y de Jesus amo igual con el un arquitecto quien ta trabaja junto con el quien ta hace con el construida. El arquitecto amo el quien ta hace con el diseño; y el quien ta construi hay usa con ese diseño para hace un estructura.

 Ele el Palabra. Antes ya existi si Jesus aqui na tierra, el Biblia ya llama con ele “el Palabra.” (Juan 1:1) Ta dale este mira que ya usa el Dios con el de suyu Anak para hace pasa con el informacion y maga instruccion na otro maga espiritu creatura.

 Posible tambien que ya sirvi si Jesus con el quien ta converza por parte del Dios na maga gente aqui na tierra, igual cuando ya dale Le maga instruccion con kanda Adan y Eva na jardin de Eden. (Genesis 2:16, 17) Posible que si Jesus el angel quien ya guia con el maga Israelita de antes na desierto y de quien voz que necesita gayot sila obedece.—Exodo 23:20-23. a