Kha nga Dzifakazi dza Jehovha, ho zama gu vbanya khu ndziya nya wuKristo eyi Jesu a hi hevbudzidego, a gu iyo yayimweyo vapostoli va vbanyidego khiyo. Ndrima yeyi yi na ganeya khu gu humbisa matshina nya esi hi si khodwago.

1. Nungungulu. Ethu ha gu khozeya Nungungulu moyo nya lisine, nya Tshivba Yatshavbo, Muvangi wathu, lina laye a gu Jehovha. (Ndzimo 83:18; Gutuledwa 4:11) Uye khuye Nungungulu wa Abrahama, Mosi ni Jesu. — Ekisodha 3:6; 32:11; Johane 20:17.

2. Bhibhiliya. Ethu ha gu wona Bhibhiliya kha nga mahungu aya Nungungulu a lovedego vathu. (Johane 17:17; 2 Thimoti 3:16) Ha gu seketeya gukhodwa gwathu avba nya 66 mabhuku nya iyo, a gu ayo ma wumbago “testamenta ya gale” ni “testamenta nya yiphya.” Jason D. BeDuhn, muhevbudzi nya silo si yelanago ni wukhongeyi, tshamusede gu khuye Dzifakazi dza Jehovha dza gu seketeya gukhodwa ni mavbanyelo yawe avba nya esi Bhibhiliya yi si ganeyago, vbavbandze basi nyo ganeye gu khavo va gu vbanya khu guya khesi Bhibhiliya yi si ganeyago.” a

   Ethu ha gu khodwa satshavbo esi si lovidwego omu nya Bhibhiliya. Ganiolu tepo hi zamago gu pwisisa Bhibhiliya, hi ngu tugula gu khethu simbe sipandre nya Bhibhiliya si ngu tshamuseya silo si nga dugeleya gale yoyo, mwendro si na dugeleyago mindru ga tshigu, nigu simbe sipandre sa gu thumisa sipimaniso ambari siyeyedzo, mwendro mongo ni malito nyo tshambiseye gasi gu tshamuseya gilo nyo khaguri. Gutuledwa 1:1.

3. Jesu. Ethu ha gu landreya sihevbudzo ni giyeyedzo gya Jesu hi bwe hi mu ninga wuzundzo khu kotani nya olu a gu Muvbulugisi wathu ni olu a gu Gyanana gya Nungungulu. (Matewu 20:28; Mithumo 5:31) Khu kharato, ethu hi maKristo. (Mithumo 11:26) Ambari ulolo, hi ngu hevbula omu nya Bhibhiliya gu khethu Jesu khandri Nungungulu nya Tshivba Yatshavbo nigu khethu milowo kha yi seketeyi Sihevbudzo nya vararu moyo. — Johane 14:28.

4. Mufumo wa Nungungulu. Mufumo nya lisine wa ndzadzini, nasiri gilo gi gomogo myonyoni nya maKristo. Uwo wu na tshikedza mifumo nya vathu wu bwe wu tadzisa makungo ya Nungungulu khu mafu. (Dhaniyeli 2:44; Matewu 6:9, 10) Isoso si na girega nugunugo kamo, kholu giprofeto nya Bhibhiliya gya gu yeyedza gu khigyo ha gu vbanya ‘matshiguni nya guhegise.’ — 2 Thimoti 3:1-5; Matewu 24:3-14.

   Jesu khuye Pfhumu nya Mufumo wa Nungungulu ndzadzini. Uye phede gu fuma khu 1914. — Gutuledwa 11:15.

5. Guvbulugiswa. Gutshulega avba nya gighoho ni gufa si kodzegide khu kotani nya muphaso nya gudzegiswe wa Jesu. (Matewu 20:28; Mithumo 4:12) Gasi gu vathu va phasega khu muphaso wowo, kha si eneyi basi gu va yeyedza gu khodwa ga Jesu, ganiolu gu vbwetega va vbindrugedza mavbanyelo yawe va bwe va bhapatiswa. (Matewu 28:19, 20; Johane 3:16; Mithumo 3:19, 20) Mithumo nya muthu khiyo yi yeyedzago gu khiyo gukhodwa gwaye gu ngu vbanya gani. (Jakobe 2:24, 26) Ambari ulolo, guvbulugiswa khandri gilo hi nga dzi gireyago habune — hi gu manide khu kotani nya “wuhigo wa Nungungulu.” — Vagalatiya 2:16, 21.

6. Ndzadzi. Jehovha Nungungulu ni Jesu Kristo, gumogo ni dzingilozi nyo tumbege khavo va vbanyago ndzadzini. b (Ndzimo 103:19-21; Mithumo 7:55) Nigu tengo nya wudugwana nya vathu a gu — 144 000 — khavo va na wuswago va hongola ndzadzini gasi guya fuma ni Jesu. — Dhaniyeli 7:27; 2 Thimoti 2:12; Gutuledwa 5:9, 10; 14:1, 3.

7. Mafu. Nungungulu vangide mafu gasi gu vbanya vathu. (Ndzimo 104:5; 115:16; Muhevbudzi 1:4) Uye a na kategisa vathu va mu engisago khu womi nyo vbeleye ni gu vbanya kala gupindruga paradhesini mafuni. — Ndzimo 37:11, 34.

8. Guvivba ni gutshaniseka. Isoso si phede tepo ngilozi mweyo ya Nungungulu yi nga mu kanyisa. (Johane 8:44) Ngilozi yoyo, iyo khu hwane yi nga ranwa gu pwani khiyo “Sathane” ni “Dhiyabhulosi,” yi sengide patwa nyo pheye nya vathu gasi va dzi pata nayo, khu kotani nya isoso situgulwana sa patwa wule sa gu vbwera mihandro nyo vbise ngudzu. (Genesi 3:1-6; Varoma 5:12) Nigu gasi gu lulamisa gigaradzo gegi gi vangidwego khu Sathane, Nungungulu a ngu dzumeleya guvivba ni gutshaniseka, ganiolu Uye kha na nga si dzumeleya kala gupindruga.

9. Gufa. Vathu va gufa guvbanya go vbeya. (Ndzimo 146:4; Muhevbudzi 9:5, 10) Avo kha va hongoli vaya vbiswa niloni wu dzurago khu tshivba.

   Nungungulu a ngu tumbisa gu wusa dzimiliyoni nya vathu va fudego. (Mithumo 24:15) Ambari ulolo, vale va bombago gu hevbula dzindziya dza Nungungulu hwane nyo wuswe khu ga vafudego va na fuviswa kala gupindruga nya mba gitumbiso nyo wuswe gambe. — Gutuledwa 20:14, 15.

10. Ndranga. Ethu ha gu pimedzeya giyeyedzo gi vegidwego khu Nungungulu nya mutshadho, gu gu pwanano wu girwago khu mwama moyo ni nyamayi moyo, ni gu khethu wubhayi khigyo basi gighelo gi hi dzumeleyago gu tshula mutshadho. (Matewu 19:4-9) Hi ngu tiyisega gu khethu wugengeyi wu gomogo omu nya Bhibhiliya wu ngu phasa dzindranga gu dugeleya. — Vaefeso 5:22–6:1.

11. Wukhozeyi wathu. Ethu kha hi khozeyi gihambano mwendro sithombe. (Dhewuteronome 4:15-19; 1 Johane 5:21) Sipandre nya wukhozeyi wathu so pata:

    • Gu gombeya ga Nungungulu. — Vafilipi 4:6.

    • Gu leri ni gu hevbula Bhibhiliya. — Ndzimo 1:1-3.

    • Gu dundrugeya khesi hi si hevbulago omu nya Bhibhiliya. — Ndzimo 77:12.

    • Gu tshangana gumogo gasi hi gombeya, hi hevbula Bhibhiliya, hi embeleya, hi yeyedza gukhodwa gwathu, ni gu tiyisa maKristo makhwathu ni vambe. — Vakolosi 3:16; Vahebheru 10:23-25.

    • Gu tshumayela “mahungu nya yadi nya Mufumo.” — Matewu 24:14.

    • Gu phasa vale va vbwetago giphaso. — Jakobe 2:14-17.

    • Gu vbaha ni gu wusedza dziSalawu nya Mufumo ni dzimbe dzinyumba dzi thumiswago khu hengeledzano gasi gu andrisa thumo nyo hevbudze vathu Bhibhiliya wu girwago mafuni gwatshavbo. — Ndzimo 127:1.

    • Gu phasa ava va thegedwego khu dzimhango. — Mithumo 11:27-30.

12. Hengeledzano yathu. Ethu hi sasamedzidwe khu mabandla avbo limwedo ni limwedo li thangedwago khu huwo nya madhota. Ambari ulolo, madhota kha vari vapaderi mwendro vafundrisi vathu, ganiolu avo vathu va hi thumeyago mahala. (Matewu 10:8; 23:8) Ethu kha hi giri dzidhizimo mwendro gu hengiseya yimbe miningelo mitshanganoni yathu. (2 Vakorinto 9:7) Mithumo yathu ya gu phasedzedwa khu miningelo nya gu dzigoleye.

    Huwo nya guthangeye, tsawa nya wudugwana nya vandriyathu nyo vidzwe va thumeyago tsindza gwathu ga mafuni gwatshavbo, khavo va thangeyago Dzifakazi dza Jehovha dzi gomogo mafuni gwatshavbo. — Matewu 24:45.

13. Gupwanana gwathu. Mafuni gwatshavbo hi ngu pwana khu kotani nya esi hi si khodwago. (1 Vakorinto 1:10) Ethu ha gu dzi garadzeya gu mba dzumeleya gu khethu lifumbo, tshonge, mavbanyelo ya gipandreni gwathu ni esi hi gu naso si hi hambanisa. (Mithumo 10:34, 35; Jakobe 2:4) Ambari ulolo, gupwanana gwathu gu ngu hi dzumeleya gu hi dzi hatheya esi hi si golago. Fakazi ni Fakazi ya gu hunga makungo khu gu thumisa livhalo laye li hevbudzidwego khu Bhibhiliya. — Varoma 14:1-4; Vahebheru 5:14.

14. Mavbanyelo yathu. Ethu ha gu dzigaradzeya gu yeyedza lihaladzo nya lisine ga satshavbo esi hi girago. (Johane 13:34, 35) Ha gu potsa gu gira silo si gu mba tsakisa Nungungulu, gupata ni gu thumisa novba khu ndziya nyo vivbe, si thulago gu thedwa novba. (Mithumo 15:28, 29; Vagalatiya 5:19-21) Ethu hi vathu nya gurule nigu kha hi dzi bedzedzeyi omu nya dzinyimbi. (Matewu 5:9; Isaya 2:4) Ha gu engisa wufumu wa omu hi vbanyago umo hi bwe hi engisa milayo yawo yo nga nga ba yi si hi himbedzeyi gu engisa milayo ya Nungungulu. — Matewu 22:21; Mithumo 5:29.

15. Gupwanana gwathu ni vambe. Jesu hi rumide esi: “Haladza muthu kwanu kha nga idzo u dzi haladzago khidzo.” A di bwe a ganeya gu khuye maKristo “kha [ma] lumbi litigo.” (Matewu 22:39; Johane 17:16) Khu kharato ethu ha gu zama gu “girela esi nya sadi vathu vatshavbo,” khu gighelo gyogyo kha hi dzi bedzedzeyi omu nya silo nya politika hi bwe hi potsa gu dzi bedzedzeya omu nya wumbe wukhongeyi. (Vagalatiya 6:10; 2 Vakorinto 6:14) Ambari ulolo, ethu hi ngu ninga lisima esi vambe va hungago ga silo soso. — Varoma 14:12.

Wa gu ba uri ni simbe siwudziso maningano ni Dzifakazi dza Jehovha, u nga leri nya singi khethu omu nya sayiti yathu, gu bhuleya mweyo nya dzixikiritori dzathu, guta mitshanganoni yathu Salawuni nya Mufumo yi gu romo vbafuvbi nago mwendro gu ganeya ni mweyo nya Dzifakazi dza Jehovha dza gipandreni gwago.