Jesuba iyi kʼaidupanʉra jaradiadata Jeowa ʉ̃rʉ Kʼawuabipanʉrãbara zarea opanʉ maʉ̃rane kĩrãkʼa oita. Naʉ̃ artikulode wiña jara ũrĩbibʉ dayirãba ĩjãbʉ ʉ̃rʉ.

1.   Daizezeta. Yi zromata, Daizezearata akʉza naʉ̃ drʉa parãnata, maʉ̃ra abapaibʉ, iyi trʉ̃arãra Jeowa, maʉ̃ʼabʉrʉ abapaiʼa yiwidʼipanʉ (Salmo 83:18; Revelación 4:11). Iyira Abrahán Daizeze, Moisés akʉza Jesu (Éxodo 3:6; 32:11; Juan 20:17).

2.   Daizeze Bedʼeata. Krĩchapanʉ Jeowabara naʉ̃ librora osita ẽbẽrarãita (Juan 17:17; 2 Timoteo 3:16). Daizeze Bedʼeadera 66 libro erbʉ, maʉ̃nebʉ Antiguo Testamento akʉza Nuevo Testamento, maʉ̃neba ʉ̃tʉ zebibʉ daiba ĩjãbʉra. Nejaradiabari Jason BeDuhnba jarabʉ: «Jeowa ʉ̃rʉ Kʼawuabipanʉrãba ãya ĩjãbʉta akʉza ãya obʉra jõma ʉ̃tʉ zebibʉ Daizeze Bedʼeadeba akʉza ãya kʼawua wãra awuara oẽ». a

    Jõma ĩjãpanʉ Daizeze Bedʼeaba jarabʉra, mamina dayirãba lebʉrʉdera kʼawuapanʉ mama jarabʉra ʉ̃kʉrʉta berabarisita akʉza ʉ̃kʉrʉta ʉ̃rabʉrʉ berabarita, adewara kʼawuapanʉ ʉ̃kʉrʉ testodebemara dayirã bia jaradiaita zokʼapanʉ yizata (Revelación 1:1).

3.   Jesu. Opanʉ Jesuba jaradiabadata akʉza iya odata, iyira Dayirã ẽdrʉbibari, adewara iyira Daizeze Warra, maʉ̃ kʼarea wawiata ũdubipanʉ (Mateo 20:28; Hechos 5:31). Maʉ̃ba ũdubibʉ dayirãra kristianota Jesuba jaradata opanʉ baera (Hechos 11:26). Mawũãsidu Daizeze Bedʼeabara jaradia ẽ Jesura Daizezeta akʉza jaradia ẽ Daizeze ũbeabʉ ʉ̃rʉ (Juan 14:28).

4.   Daizeze Nokʼota. Naʉ̃ Nokʼora ʉ̃tʉbema akʉza iyira neẽ kristianora sode eda. Naʉ̃ Nokʼobara jõbiyi nokʼo naʉ̃ drʉadebemara, mawũã Jeowaba naʉ̃ drʉaita kãgabadata oita (Daniel 2:44; Mateo 6:9, 10). Naʉ̃ra aranʉ bʼai aripe berabariyi, Daizeze Bedʼeade eda propesiarabʉba jarabʉ baera naʉ̃ ewari jõira arakʼaitabata (2 Timoteo 3:1-5; Mateo 24:3-14).

    Jesubara Daizeze Nokʼo ʉ̃tʉbema Nokʼota zokʼabʉ maʉ̃ra ojʉ̃drʉsi 1914deba (Revelación 11:15).

5.   Ẽdrʉbidata. Jesuta dayirãbari kʼãwũã beisi baera ẽbẽrarãra ẽdrʉseabʉ nekayiruadeba akʉza beideba (Mateo 20:28; Hechos 4:12). Kʼãwũã Jesu beida kʼarea ẽbẽrarãba nebia ũduira Jesu ʉ̃rʉ ĩjãta erbaibara. Ãya nekayirua obadata idubʉibara akʉza buru kʼoe zeibara (Mateo 28:19, 20; Juan 3:16; Hechos 3:19, 20). Ẽbẽra abaʉba wãrĩnu ũdubibʉ iya nekʼãrẽ obʉdeba ĩjã erbʉta (Santiago 2:24, 26). Mamina Jeowabara dayirãra ẽdrʉbi ẽ aukʼara dayirãta ẽbẽra bia baera, awuarabʉrʉ iya ẽdrʉbibʉ iya mejãcha kãgabʉ baera dayirãta (Gálatas 2:16, 21).

6.   Bajãta. Jeowata, Jesuta akʉza angelera biata ʉ̃tʉ ewaradepanʉ (Salmo 103:19-21; Hechos 7:55). b Ẽbẽrarã wikauta (144.000), maʉ̃rata jẽda piradrʉyi ʉ̃tʉ bʼaita Jesuʉ̃meba zokʼaita (Daniel 7:27; 2 Timoteo 2:12; Revelación 5:9, 10; 14:1, 3).

7.   Drʉata. Daizezebara naʉ̃ drʉara parãsi mawũã ẽbẽrarãta ewari jõmaʉ̃nẽ panamarẽã (Salmo 104:5; 115:16; Eclesiastés 1:4). Jeowabara oyi ẽbẽrarã kʼẽrẽpabʉra wua kaya ẽ bamarẽã akʉza ewari jõmaʉ̃nẽ panamarẽã naʉ̃ drʉa ẽjũã kĩrãwãreã zebʉrʉde (Salmo 37:11, 34).

8.   Nekayirua opanʉta akʉza zʉbʉriata. Daizeze Bedʼeabara jarabʉ angel aba Daizeze ʉ̃rʉ wãsita, maʉ̃ kʼarea maʉ̃neba yẽta nekayiruara jʉ̃drʉsi akʉza zʉbʉriaita (Juan 8:44). Maʉ̃ angel kayirua Daizeze ʉ̃rʉ wãnaneba yẽta trʉ̃gasida Diaru akʉza Satanás. Diarura Adánʼa akʉza Evaʼa ikũa bedʼeasi iyiare bamarẽã, maʉ̃neba yẽta ãyi wũãwũãrãra nekayirua mejãcha berabarisi (Génesis 3:1-6; Romanos 5:12). Jeowabara ẽbẽrarãba kʼawuadamarẽã kʼaiba bia zokʼabʉta, iduaribibʉ kʼãrẽ, nekayirua berabarimarẽã akʉza zʉbʉriamarẽã, mamina maʉ̃ra mawũã iduaribi ẽ bayi ewari biobayeda.

9.   Beita. Ẽbẽra beibʉrʉdera mamapai taʉdogo (Salmo 146:4; Eclesiastés 9:5, 10). Ẽbẽrarã beidarãra tʉbʉ pʉreade eda zʉbʉriabʉ ẽ.

    Ẽbẽrarã mejãcha beidarãra Daizezebara jẽda piradrʉbiyi (Hechos 24:15). Mamina ẽbẽra aba jẽda piradrʉdata Daizeze ʉ̃rʉ kʼawuakĩrã ẽ bʉrʉ, Jeowabara beayi iyira akʉza jẽda piradrʉbi ẽ bayi (Revelación 20:14, 15).

10.   Mebẽrãta. Jeowaba naʉ̃ drʉa osidera parãsi, yumakẽrãta aba akʉza yuwẽrãta aba mõbe juwa jidabisi, adewara jarasi ãyi yi idubʉdaira awurume ãĩ babʉrʉdebʉrʉ idubʉibarata (Mateo 19:4-9). Wãrĩnu ĩjãpanʉ Daizeze Bedʼeaba ũrãgʼa diabʉra arigʉ yibiata akʉza kʼarebabʉ mebẽrã sobia bʼaita (Efesios 5:22–6:1).

11.   Sãwũã ũdubipanʉta Jeowaba jarabʉ opanʉta. Kruzʼa akʉza nekʼãrẽ oma yiwidʼida ẽ (Deuteronomio 4:15-19; 1 Juan 5:21). Dayirãba Jeowaba kãgabʉ oira naʉ̃ta opanʉ:

    •   Yiwidʼipanʉ Daizezeʼa (Filipenses 4:6).

    •   Daizeze Bedʼeata lepanʉ akʉza kʼawuapanʉ (Salmo 1:1-3).

    •   Krĩchapanʉ Daizeze Bedʼea ʉ̃rʉ kʼawuadata (Salmo 77:12).

    •   Ãba yi jʉrepanʉ Daizezeʼa yiwidʼita, trãnaita, Daizeze Bedʼea akʉita, dayirãba ĩjãbʉ ũdubita akʉza yiya so zarea diaita (Colosenses 3:16; Hebreos 10:23-25).

    •   Jaradiapanʉ Daizeze Nokʼoba kʼãrẽ nebia wei ʉ̃rʉ (Mateo 24:14).

    •   Kʼarebabʉ yi zʉbʉriabʉta (Santiago 2:14-17).

    •   Betelta, Daizeze de ãba yi jʉrebarita, Opisina jĩgaraʉba tradusibarita akʉza nekʼãrẽ awuarabʉta daiba opanʉ mõbe bia akʉpanʉ (Salmo 127:1).

    •   Neida berabaribʉrʉde kʼareba wãpanʉ (Hechos 11:27-30).

12.   Dayirã organizasionta. Erpanʉ kongregasionʼrata bio, maʉ̃ra kongregasionebʉ kʼaiba akʉbʉta, maʉ̃rãra zõrãrã, ãyara diada ẽ platata akʉza wuabemaraira yi zromata akʉda ẽ awuarabʉrʉ dauchabʉ (Mateo 10:8; 23:8). Diada ẽ diezmota akʉza widida ẽ platata (2 Corintios 9:7). Ẽbẽrarãbara diapanʉ platara ãya kãgabʉta akʉza jarada ẽ sõbe diasita, maʉ̃ platara zokʼapanʉ nekʼãrẽ oita dai organizasione.

     Bʉ ẽbẽrarã wikabʉta mamina maʉ̃rãra mejãcha buru bia. Ãyira ũdukʼaude Zõrãrã Burubia kĩrãkʼa. Maʉ̃rabara naʉ̃ drʉa jõmaʉ̃nẽ akʉpanʉ nekʼãrẽ opanʉta bia odamarẽã (Mateo 24:45).

13.   Dayirã ãbabʉta. Jõmaʉ̃ta pʉwʉrʉra awuara awuarakadebema mawũãsidu abarika krĩchapanʉ (1 Corintios 1:10). Ʉ̃kʉrʉba plata erbʉmina akʉza neẽmina, awuru pʉwʉrʉdebemamina akʉza awuru kulturamina, zarea opanʉ kĩrã mitia akʉda ẽ baita (Hechos 10:34, 35; Santiago 2:4). Jõmaʉ̃ta abarika krĩchapanʉmina aba abakaʉba jidaseabʉ dayimabʉta (Romanos 14:1-4; Hebreos 5:14).

14.   Dayirãba opanʉta. Jõma dayirãba kʼãrẽ opanʉra, opanʉ kãgaba (Juan 13:34, 35). Zarea opanʉ oẽ baita Jeowaba kãga ẽãta, maʉ̃ kʼarea wara bia zokʼapanʉ, bari jaradaita, wara kẽgʉde eda bʉeda ẽ (Hechos 15:28, 29; Gálatas 5:19-21). Wuabema ẽbẽrarãbawara aduʼabʉ akʉza eda yõne wã ẽ (Mateo 5:9; Isaías 2:4). Wawiata ũdubipanʉ nokʼo naʉ̃ drʉadebemara akʉza ũrĩpanʉ ãya zokʼabʉta. Mamina ãya Jeowaba kãga ẽã omarẽã jarabʉdadera ũrĩna ẽ (Mateo 22:21; Hechos 5:29).

15.   Dayirã wuabemarabawara sãwũãbʉta. Jesuba jarasi: «Kãgara wuabemarãra bʉyikʉza kãgabʉ kĩrãkʼa». Adewara jarasi kristianorãra «naʉ̃ drʉadebema ẽ» (Mateo 22:39; Juan 17:16). Zarea opanʉ wuabemara ẽbẽrarãbawara bia bʼaita, mawũãsidu eda wãna ẽ politikade, adewara ãba zeda ẽ wuabemara religionʼrabawara (Gálatas 6:10; 2 Corintios 6:14). Mamina wuabemara ẽbẽrarãta eda religione akʉza politikade wãbʉrʉdera kʼãrẽ jarada ẽ (Romanos 14:12).

 Audre kʼawuakĩrãbʉbʉrʉ Jeowa ʉ̃rʉ Kʼawuabipanʉrã ʉ̃rʉ, kʼãrẽ ĩjãbʉta. Eda wãseabʉ internetʼne dai paginane. Adewara kartata zokʼaseapanʉ dai opisinaʼa akʉza wãseabʉ dai ãba yi jʉrebarima, mawũã ẽ bʉrʉ widiseabʉ Jeowa ʉ̃rʉ Kʼawuabipanʉrã.