Como maga Testigo de Jehova, ta pricura kame sigui con el clase de Cristianidad que ya enseña si Jesus y ya sigui el de suyu maga apostoles. Este articulo ta dale informacion acerca na cosa kame ta creé.

1.   Dios. Ta adora kame con el unico verdadero y Todopoderoso Dios, el Creador que el nombre amo Jehova. (Salmo 83:18; Revelacion 4:11) Ele el Dios de Abraham, Moises y Jesus.​—Exodo 3:6; 32:11; Juan 20:17.

2.   Biblia. Ta creé kame que el Biblia amo un inspirao mensaje del Dios para na maga gente. (Juan 17:17; 2 Timoteo 3:16) Ta man base kame con el diamon creencia na entero 66 libro de este que ta inclui el “Daan Testamento” y el “Nuevo Testamento.” Justo si Professor Jason D. BeDuhn cuando ya escribi le que el maga Testigo de Jehova yan base con el “diila creencia y practica na cosa gayot deverasan ta habla el Biblia y gendeh na cosa sila daan ta pensa acerca na mensaje de este.” a

    Ta acepta kame con el entero Biblia pero ta creé kame que el cuanto parte de este gendeh literal sino figurativo o simbolico.​—Revelacion 1:1.

3.   Jesus. Ta sigui kame con el enseñanza y ejemplo de Jesucristo y ta honra con ele como el diaton Salvador y el Anak del Dios. (Mateo 20:28; Maga Actividad 5:31) Poreso, maga Cristiano kame. (Maga Actividad 11:26) Pero ya aprende kame na Biblia que si Jesus gendeh el Todopoderoso Dios y gendeh base na Escritura el doctrina de Trinidad.​—Juan 14:28.

4.   El Reino del Dios. Este un deverasan gobierno na cielo y gendeh un cosa que talli na corazon del maga Cristiano. Este hay cambia con el maga gobierno del gente y cumpli con el proposito del Dios para na tierra. (Daniel 2:44; Mateo 6:9, 10) Cerca ya este actua cay el maga profecia na Biblia ta indica que ta vivi ya kita ahora na “ultimo maga dia.”​—2 Timoteo 3:1-5; Mateo 24:3-14.

    Si Jesus amo el Rey na Reino del Dios na cielo. Ya principia le rula del 1914.​—Revelacion 11:15.

5.   Salvacion. Posible el diaton salvacion desde na pecado y muerte por medio na rescate de Jesus. (Mateo 20:28; Maga Actividad 4:12) Para beneficia na este sacrificio, el maga gente necesita tiene fe con Jesus, cambia el diila manera de vida y bautiza. (Mateo 28:19, 20; Juan 3:16; Maga Actividad 3:19, 20) Puede mira na accion del un persona si vivo ba el de suyu fe. (Santiago 2:24, 26) Pero gendeh kita puede tiene salvacion por medio lang del diaton mismo esfuerzo sino por medio del “incomparable pagka-bueno del Dios.”​—Galacia 2:16, 21, NW.

6.   Cielo. Na cielo ta esta si Jehova, si Jesus y el maga fiel angel. b (Salmo 103:19-21; Maga Actividad 7:55) Tiene 144,000 quien hay resucita na cielo para rula na Reino junto con Jesus.​—Daniel 7:27; 2 Timoteo 2:12; Revelacion 5:9, 10; 14:1,3.

7.   Tierra. El Dios ya crea con el tierra para onde queda el maga gente hasta para cuando. (Salmo 104:5; 115:16; Eclesiastes 1:4) Hay bendici el Dios con el maga obediente gente con buen salud y vida eterna na paraiso tierra.​—Salmo 37:11, 34.

8.   Maldad y sufrimiento. Ya principia este cuando uno del maga angel el ya man rebelde con Dios. (Juan 8:44) Despues del de suyu rebelion, ya llama con ele “Satanas” y “Diablo”. Ya convinci le con el primer man maridable para sigui con ele y ya tiene este mal efecto na diila maga descendiente. (Genesis 3:1-6; Roma 5:12) Para puede contesta con el maga acusacion de Satanas, el Dios ya permiti con el maldad y sufrimiento pero gendeh Le deja que continua este hasta para cuando.

9.   Muerte. Gendeh mas ta existi aquellos quien ya muri. (Salmo 146:4; Eclesiastes 9:5, 10) Gendeh sila ta sufri na infierno.

    El Dios hay resucita con el millones de gente. (Maga Actividad 24:15) Pero hay destroza el Dios con aquellos quien gendeh obedece con ele despues kanila resucita y nuay mas sila esperanza que vivi otravez.​—Revelacion 20:14, 15.

10.   Familia. Ta sigui kame na original arreglamiento del Dios na matrimonio como un permanente relacion entre na un mujer y un hombre. Sexual imoralidad lang el valido razon para man divurcio. (Mateo 19:4-9) Convincido kame que el maga principio na Biblia puede ayuda para queda alegre el familia.​—Efeso 5:22–​6:1.

11.   Diamon adoranza. Gendeh kame ta adora na cruz o na maskin cosa imagen. (Deuteronomio 4:15-19; 1 San Juan 5:21) El siguiente amo el maga importante aspeto del diamon adoranza:

    •   Ta reza con Dios.​—Filipo 4:6.

    •   Ta le y ta estudia con el Biblia.​—Salmo 1:1-3.

    •   Ta medita con el cosa kame ta aprende na Biblia.​—Salmo 77:12.

    •   Ta man junto-junto para reza, estudia con el Biblia, canta, expresa diamon fe y anima con otro.​—Colosa 3:16; Maga Hebreo 10:23-25.

    •   Ta predica con el “Buen Noticia acerca del Reino.”​—Mateo 24:14.

    •   Ta ayuda con aquellos quien ta necesita.​—Santiago 2:14-17.

    •   Ta construi y ta mentena con el maga Kingdom Hall y otro maga facilidad que ta usa para na progreso del diamon trabajo de educacion estaba na Biblia que ta hace na entero mundo.​—Salmo 127:1.

    •   Ta ayuda na disaster relief.​—Maga Actividad 11:27-30.

12.   Diamon organizacion. Ya organiza kanamon na maga congregacion y tiene un grupo de maga anciano quien ta mira con el congregacion. Pero, el maga anciano gendeh maga padre o pastor y nuay sila sueldo. (Mateo 10:8; 23:8) Gendeh kame ta colecta sen na diamon miting ni ta saca diez por ciento. (2 Corinto 9:7) Ta hace con el todo diamon trabajo usando el maga donacion estaba na maga gente quien gendeh ta manda conoce diila mismo cuerpo.

     El Cuerpo Gobernante, un diutay grupo de maga mature Cristiano quien ta sirvi na diamon world headquarters, ta dale direccion na maga Testigo de Jehova na entero mundo.​—Mateo 24:45.

13.   Diamon unidad. Na entero mundo, unido kame na diamon creencia. (1 Corinto 1:10) Ta hace kame esfuerzo para gendeh tiene division por causa na raza, cultura o estado na vida. (Maga Actividad 10:34, 35; Santiaggo 2:4) Pero maskin unido, tiene siempre kame libertad para hace maga personal decicion. El cada Testigo de Jehova ta hace con el de suyu personal decicion base na de suyu conciencia que yan train base na Biblia.​—Roma 14:1-4; Maga Hebreo 5:14.

14.   Diamon conducta. Ta pricura kame dale mira deverasan amor por medio na diamon conducta. (Juan 13:34, 35) Ta evita kame hace maga cosas que gendeh ta hace alegre con Dios incluido el gendeh justo usada del sangre igual como el abonada de sangre. (Maga Actividad 15:28, 29; Galacia 5:19-21) Ta cultiva kame paz y gendeh kame ta participa na guerra. (Mateo 5:9; Isaias 2:4) Ta respeta kame con el gobierno del lugar onde kame ta queda y ta obedece kame el maga ley del gobierno basta gendeh este contra na maga ley del Dios.​—Mateo 22:21; Maga Actividad 5:29.

15.   Diamon relacion con otro. Si Jesus ya habla: “Ama con el dituyo vecinos, como ta ama tu con el dituyo mismo cuerpo.” Ya habla tambien le que el maga Cristiano gendeh parte del mundo. (Mateo 22:39; Juan 17:16) Ta pricura kame hace “bueno con todo gente” pero ta esta kame neutral na politica y ta evita kame queda envuelto na otro maga religion. (Galacia 6:10; 2 Corinto 6:14) Pero ta respeta kame el decicion del otro acerca con este.​—Roma 14:12.

 Si tiene tu maga pregunta acerca na creencia del maga Testigo de Jehova, puede tu le mas informacion na diamon website, man contact na uno del diamon maga oficina, atende miting na Kingdom Hall que cerca na de tuyu lugar o man cuento con el un Testigo de Jehova na de ustedes lugar.