Selaku Saksi-Saksi Jahwe, terus iusahaken kami ndalanken kai si iajarken Jesus bage pe si ilakoken murid-muridna mbarenda. Enda me piga-piga si iteki kami.

1.   Dibata. Sada ngenca Dibata si isembah kami, gelarNa Jahwe. Ia me Dibata Si Madakuasa ras Si Nciptaken kerina. (Masmur 83:18, Terjemahan Dunia Baru; Ketangkasen 4:​11) Ia me Dibata Abraham, Musa, ras Jesus.​—Keluaren 3:6; 32:11; Johanes 20:17.

2.   Pustaka si Badia. Iakui kami maka Pustaka e Kata Dibata man manusia. (Johanes 17:17; 2 Timotius 3:​16) Kerina si iteki kami dasarna arah 66 buku bas Pustaka eme “Perjanjin si Ndekah” ras “Perjanjin si Mbaru.” Iakui Profesor Jason D. BeDuhn kerna si e. Ikatakenna maka kerina si iteki Saksi-Saksi Jahwe “tuhu-tuhu erpalasken Pustaka si Badia, la soal cocok ntah lang menurut kalak e.” a

    Amin pe setuju kami ras kerina isi Pustaka, labo kami fundamentalis. Iteh kami maka piga-piga isi Pustaka nggunaken bahasa simbol ntah pe lambang emaka la banci mis iangkai.​—Ketangkasen 1:1.

3.   Jesus. Ikutken kami kai si iajarken Jesus bage pe kai si ilakokenna. Iergai kami kel ia selaku Juru Selamat bage pe Anak Dibata. (Matius 20:28; Perbahanen Rasul-Rasul 5:​31) E me alasenna ngkai maka kami igelari Kristen. (Perbahanen Rasul-Rasul 11:26) Tapi iteh kami ka arah Pustaka maka Jesus e labo Dibata Si Madakuasa. Janah la lit ayat-ayat bas Pustaka si ngajarken kerna Dibata Si Telu Sada ntah pe Tritunggal.​—Johanes 14:28.

4.   Kerajan Dibata. Enda sada pemerentahen si tuhu-tuhu lit i bas surga, labo bas pusuh kalak Kristen. Igantikenna me pagi kerina pemerentahen manusia janah terjadi me peraten Dibata i doni. (Daniel 2:​44; Matius 6:​9, 10) Lanai ndekah terjadi me enda kerina, perban nina Pustaka kita nggo nggeluh bas “wari-wari pendungi.”​—2 Timotius 3:​1-5; Matius 24:​3-​14.

    Jesus me Raja Kerajan Dibata. Ia mulai merentah i surga tahun 1914.​—Ketangkasen 11:15.

5.   Keselamaten. Banci kita bebas arah dosa ras kematen perban lit korban tebusen Jesus. (Matius 20:28; Perbahanen Rasul-Rasul 4:​12) Gelah banci sidat manfaat arah korban tebusen e, arus kita erkiniteken man Jesus. Selain si e, arus ka kita robah janah iperidiken. (Matius 28:19, 20; Johanes 3:​16; Perbahanen Rasul-Rasul 3:​19, 20) Kinitekenta arus teridah arah perbahanen. (Jakup 2:​24, 26) Labo perban beluhta ntah pe gegehta maka banci kita selamat, tapi situhuna perban “lias ate Dibata si mbelin.”​—Galati 2:​16, 21.

6.   Surga. Dibata Jahwe, Jesus Kristus, bage pe malekat-malekat si setia tading i surga. b (Masmur 103:19-​21; Perbahanen Rasul-Rasul 7:​55) Lit pagi 144.000 kalak si tading i surga guna merentah ras Jesus bas Kerajan Dibata.​—Daniel 7:​27; 2 Timotius 2:​12; Ketangkasen 5:​9, 10; 14:​1, 3.

7.   Doni. Iciptaken Dibata doni gelah banci manusia tading i je rasa lalap. (Masmur 104:5; 115:16; Pengerana 1:4) Manusia si patuh man Dibata lanai pagi sakit janah banci nggeluh rasa lalap bas pardis i doni.​—Masmur 37:11, 34.

8.   Kejahaten ras kiniseran. Enda mulai terjadi sanga salah sada malekat Dibata mberontak. (Johanes 8:​44) Kenca malekat e mberontak, igelari me ia “Setan” ras “Iblis.” Igodana Adam ras Hawa gelah ikut ngelawan Dibata. Kerina keturunen kalak e pe kena akibatna. (Kejadin 3:​1-6; Roma 5:​12) Guna ndungi masalah si iban Setan ndai, ipediat Dibata me kejahaten ras kiniseran. Tapi, kentisik nari ipengadiNa kerina e.

9.   Kematen. Kalak si nggo mate tuhu-tuhu lanai lit. (Masmur 146:4; Pengerana 9:​5, 10) Labo ia isiksa bas api neraka.

    Ipekeke Dibata me pagi nterem kalak si nggo mate. (Perbahanen Rasul-Rasul 24:15) Tapi, adi kalak si nggo ipekeke e la nggit ndalanken undang-undang Dibata, ikernepken me ia seh rasa lalap janah lanai pagi ipekeke.​—Ketangkasen 20:14, 15.

10.   Keluarga. Ikutken kami undang-undang Dibata kerna perjabun. Ikataken Dibata adi sekalak dilaki ras diberu nggo erjabu, kalak e nggo ersada. Sada ngenca alasen maka banci cerai eme perbahanen seks si salah. (Matius 19:​4-9) Tek kami maka pedah bas Pustaka banci erban keluarga-keluarga ermeriah ukur.​—Epesus 5:⁠22–​6:1.

11.   Ibadah. Sanga kami ibadah, la igunaken kami salib, patung, ntah pe benda-benda si deban. (Ulangen 4:​15-​19; 1 Johanes 5:​21) Si termasuk bas ibadah kami eme:

    •   Ertoto.​—Pilipi 4:6.

    •   Mbaca ras mpelajari Pustaka.​—Masmur 1:​1-3.

    •   Ngukuri kai si nggo ipelajari bas Pustaka.​—Masmur 77:13.

    •   Ras-ras pulung guna ertoto, erlajar Pustaka, rende, janah mpegegehi sada ras si debanna.​—Kolose 3:​16; Heber 10:23-​25.

    •   Mberitaken “berita si meriah kerna Kerajan.”​—Matius 24:14.

    •   Nampati kalak si sangana susah.​—Jakup 2:​14-​17.

    •   Mbangun ras ngurus Bale Kerajan bage pe bangunen si debanna si ipake gelah reh majuna dahin erberita i sebelang doni.​—Masmur 127:1.

    •   Ikut nampati sanga terjadi bencana alam.​—Perbahanen Rasul-Rasul 11:27-​30.

12.   Organisasi. Kami iaturken i bas runggun-runggun. Si ngaturken tep-tep runggun eme badan pertua. Tapi pertua-pertua kami la seri ras pendeta. Kalak e la igaji. (Matius 10:8; 23:8) La lit perpuluhen bage pe kolekte bas perpulungen kami. (2 Korinti 9:7) Kerina kegiaten kami ibiayai arah sumbangen sukarela janah gelar kalak si mereken sumbangen la iumumken.

     Saksi-Saksi Jahwe i sebelang doni dat petunjuk arah piga-piga kalak Kristen si nggo erpengalamen si igelari Badan Pinpinen. Kalak e ngelayani bas kantor pusat kami.​—Matius 24:45.

13.   Persadan. Kerina kami banci ersada bas sebelang doni perban seri kiniteken kami. (1 Korinti 1:​10) Selain si e la ibeda-bedaken kami kalak arah suku, bangsa, ntah pe status sosialna. (Perbahanen Rasul-Rasul 10:34, 35; Jakup 2:4) Amin pe kami ersada, banci denga nge kami erban pilihen. Sanga erban keputusen, ikutken kami pusuh peraten kami si nggo sue ras patoken Pustaka.​—Roma 14:​1-4; Heber 5:​14.

14.   Perbahanen. Iusahaken kami gelah kerina si ilakoken kami erkiteken kekelengen. (Johanes 13:34, 35) La ilakoken kami kai si segat ate Dibata, misalna la kami nggit transfusi dareh. (Perbahanen Rasul-Rasul 15:28, 29; Galati 5:​19-​21) Iusahaken kami gelah dame ras kerina kalak janah la kami ikut perang. (Matius 5:9; Jesaya 2:4) Iergai kami pemerentah janah patuh kami man undang-undangna adi e la ertentangen ras undang-undang Dibata.​—Matius 22:21; Perbahanen Rasul-Rasul 5:​29.

15.   Hubungen ras kalak si deban. Nina Jesus, “Arus ikelengindu kalak si deban bagi kam ngkelengi dirindu.” Ikatakenna ka maka kalak Kristen “labo bagin i bas doni enda.” (Matius 22:39; Johanes 17:16) Emaka iusahaken kami ‘ngelakoken kai si mehuli man kerina kalak.’ Tapi, la kami ikut campur bas urusen politik janah la kami terlibat bas agama si deban. (Galati 6:​10; 2 Korinti 6:​14) Amin pe bage, iergai kami keputusen kalak kerna si e.​—Roma 14:12.

 Adi itehndu atendu terbuen kerna kiniteken Saksi-Saksi Jahwe, banci bacandu kerna si e bas situs Web kami, banci hubungindu salah sada kantor kami, banci ka dahindu perpulungen kami bas Bale Kerajan si lit bas daerahndu, ntah pe banci jumpaindu Saksi Jahwe bas daerahndu.