Swensinye twawa na mazina. Nga ca kuti swe wantu twawa na mazina yano wakatumanyilako, lyo ne Leza nye azipizile ukuwa ni zina lyakwe. Mucikwatilwe vye pa kuwa iviwuza na wumwi cikapinda ukumanyana, ukucita wo-o kwasanzyamo ukumanya izina lya muwuyo nu kutalika ukuliwonvya. Uzye wonye wo-o asa vino cifwile ukuwa pe wuciwuza witu nu Leza?

 Mwe Baibolo e Leza walanda ukuti: ‘Ne Yehova. Alili izina lyane.’ (Ayizeya 42:8, NWT) Nanti aca kuti wawa na malumbo amavule ndi vino, “Leza uwa Maka Yonsinye,” “Tatakulu,” ni lya kuti “Kelewula,” akanena awawonvi wakwe ukuti wamwitila kwi zina lyakwe.—Intaliko 17:1; Imilimo 4:24; 1 Peter 4:19.

 Amawupiliwulo ya ma Baibolo amavule yawa ni zina lya kwe Leza pa Ukufuma 6:3. Pa-a pawa amazwi ya kuti: “Nalolechezile Abrahamu, nu Ayizeki nu Jekapu kuno ne Leza wa maka yonsi. Ntayiwumbuzile kwe woliwo nizina lyanenye lyoo ilya kuti, Yehova.”

 Izina lya kwe Leza ilya kuti Yehova alizina lyo lyafuma mu Cizungu lino watalisile ukuwonvya kali nkaninye. Cingatenga awasambilile awavule wakunda ukulisimbula ukuti “Yahweh,” izina lya kuti Yehova alino lyamanyikwa nkaninye ku wavule. Uluwali lwa kutalicilapo mwe Baibolo lutalembezilwe mu Cizungu lelo lwalembezilwe mu ciHeberi. Co-o icitundu pa kulemba wakafuma kwe ndilo wakuya kwe cimani. Mu ciHeberi izina lya kwe Leza lyalembwa mwe vyo-o ivilembo 4, יהוה. Vyo-o ivilembo 4 we YHWH—vino wakakwita ukuti Tetragrammaton.