Vatu vosena vatwama namajina. Kutala nachipwa chakutamo Kalunga kupwa nalijina tahi? Kupwa namajina nakuwazachisa, chapwa chachilemu chikuma mwomwo cheji kulingisanga tutunge masepa. Uno omu mukiko chatela kupwa kutalisa kuusepa wetu naKalunga tahi?

 Kalunga ahanjika muMbimbiliya ngwenyi: “Ami yami Yehova. Eli likiko lijina lyami.” (Isaya 42:8) Numba tuhu akwechi jivulukiso jajivulu jakufwana nge “Kalunga Wangolo Josena,” “[na]Mwata Wakulitulaho,” kaha nawa “Tengi,” oloze asaka vaka-kumulemesa vamuvulukenga kuzachisa lijina lyenyi.—Kuputuka 17:1; Vilinga 4:24; WaPetulu 1, 4:19.

 MujiMbimbiliya jajivulu valumuna, hachisoneka chaKulovoka 6:3 hatwama lijina lyaKalunga. Hatwama mazu akwamba ngwavo: “Ngwalisolwelenga kupwa nguKalunga Wangolo Josena kuli Apalahama, nakuli Isaka, nakuli Yakova, oloze kangwavalwezele lijina lyami ngwami yami Yehovako.”

 Muchingeleshi, lijina lyaKalunga valyalumuna ngwavo Yehova, kaha vanalizachisanga hamyaka yayivulu. Numba tuhu vaka-kulinangula vavavulu vazanga kulivuluka ngwavo “Yahweh,” oloze vatu vavavulu valitachikiza ngwavo Yehova. Chihanda chatete chaMbimbiliya vachisonekele mulilimi lyachiHepeleu keshi muChingeleshiko, kaha veji kutanganga kufuma kuchilyo kutwala kuchimoswe. Mulilimi lyachiHepeleu lijina lyaKalunga valisoneka muvasona vawana, יהוה. Ava vasona vawana vachiHepeleu vaze valumuna ngwavo YHWH, vavuluka ngwavo Tetalangalamatoni.