Todo gente tiene personal nombre. Gendeh ba razonable que tiene tambien nombre el Dios? Si quierre tu queda amigo del un persona, importante que sabe tu de suyu nombre y usa con este. Gendeh ba ansina tambien si acerca na diaton relacion con Dios?

 Na Biblia, el Dios ya habla: “Iyo si Jehova. Ese el de mio nombre.” (Isaias 42:8) Maskin pa manada le titulo igual na “Todopoderoso Dios,” “Soberano Dios” y “Creador,” ta invita le con el de suyu maga siervo que llama con ele na de suyu personal nombre.—Genesis 17:1; Maga Actividad 4:24; 1 Pedro 4:19.

 Manada version del Biblia ta contene con el personal nombre del Dios na Exodo 6:3. Ese texto ta habla: “Ya aparece yo con Abraham, Isaac y Jacob como Todopoderoso Dios pero si acerca na de mio nombre Jehova, nuay yo manda conoce kanila.”

 El nombre del Dios que yan translate como Jehovah na English (Jehova na Chavacano) ya usa ya adentro del manada siglo. Manada scholar ta usa el nombre “Yahweh” pero mas popular para na manada el nombre Jehova. Ya escribi con el primer parte del Biblia gendeh na English sino na Hebreo, un lengguaje que ta le estaba na derecha para na izquierda. Na ese lengguaje, ya aparece el nombre del Dios como el cuatro consonant, יהוה. Conocido ese cuatro Hebreo letra que tiene transliteracion de YHWH como el Tetragrammaton.