Dhanu ceke ng’atuman utie ku nyinge. Nyo Mungu de nyinge nuti? Kara jumoko gidok jurimo, ukwayu ging’ei nying’gi man gibed gitii ku nying’gine. Nyo kara wadok jurimb Mungu de ubekwayu wang’ei nyinge man wabed watii ku nyingene?

 I Biblia, Mungu udwoko kumae: “An a Yehova, maeni nyinga.” (Isaya 42:8) Kadok nwang’u etie bende ku nying’ dupa mi pak calu ve “Mungu ma Jategokpo,” “Rwoth,” man “Jacwic” de, ento enyutho mer ni jutic pare kum eyio igi nia gilwong’e ku nyinge ma segi.​—Thangambere 17:1; Tic mi Jukwenda 4:24; 1 Pethro 4:19.

 I lok ma tung’ tung’ mi Biblia, junwang’u nying’ Mungu ma segi i buku pa Ai 6:3. Giragora maeno uyero kumae: “Man anyuthra ni [Abraham], ni Isak, man ni Yakobo, calu Mungu ma Jategokpo; ento ang’eira igi ngo ku nyinga ma Yehova.”

 Yehova re m’utie nying’ Mungu ma jucaku tio ko niai con. Kadok nwang’u dhanu ma pol ma giponjo lembe mi Biblia giwacu nia kwayu julwong’ nying’ maeno “Yahweh” de, ento nying’ne m’ung’eire nisagu i dhok ma tung’ tung’ utie Yehova. Jugoro ngo theng Biblia ma kwong’a i dhug Alur, ento i dhu Juebrania, ma jubed jusomo niai yor acwic nidok i acam. I dhok maeno jubed jukiewo nying’ Mungu ku nyiguta ang’wen, יהוה. Nyiguta ang’wen maeno mi dhu Juebrania tie YHWH.