Mod ni rgién dxiin / ¿Kaló rsáa domih ni ruun wen rizáa loh dxiin ni ruun ria xtestig Jeobá?

Ria xtestig Jeobá lega rdeedn domih ni ruun wen rizáa ria dxiin ni rgién. Loh giäl rie ni riapn nadle ben niäb domih lohn. Zi’kza nad ben niäb deedn diezmo (Mateo 10:7, 8). Balni nu ni rchiga’ deeda domih, zak zaala ndee len caj ni nu len yu’ ladni rrien. Ruite rse’t lah ria behn ni lega rdeed domih.

Nu xdiahl kos ni ruun ni nadn gién ro’ gast. Zi nak, ria ni zanihd lohn nada gall. Zi’kza, tsana zogieyn xtiidx Dios nad tuhñ gall y nadn ku’ ro’ domih loh Yu’ ladni rrien.

Riate domih ni lega rdeedn zíina yu’ Betel, domih re runíi bena dxiin rak yudar ria sa’ rseedn ni rdiéed loh liaadz, rak yudar ria ni reyuy xtiidx Dios stob país, zi’kza rak yudar ria sa’n ni zää bios loh tohb kuaa ni rrie, lagakza zi’k rak yudar ladni naaz ben warxsa domih tsáa ria Yu’ ladni rrien, runiza ben dxiin domihre rak Biblia y ria gi’ch ni ruy xtiidx Dios.

Ria’na xkuent balni rchiga’n lega deedn domih ni rkiin Yu’ ladni rrien, zakza deedna zek chizáa dxiin ni kayak debniáate gichliuh o rioptas lada deedna. Zohbte bää riate Yu’ ladni rrien rluuy behn kalota gast biu’ y riate tuhñ zak wiin loh na.