Te aʼtelil ya spasik te Testigoetik yuʼun Jehová ta swolol Balumilal, ya xjuʼ ta pasel ta swenta te majtan takʼin te jaʼiknix ya yakʼik ta spasemal yoʼtanik. a Te majtan takʼin-abi ya yichʼ akʼel ta chʼin cajaetik te ayik ta sNail Tsoblej o ya xjuʼ ta pasel jich bitʼil ya yichʼ albeyel skʼoplal ta página kuʼuntik ta Internet ta jw.org ta swenta te majtan takʼin. Jujuntul ya sta ta nopel te bin cajail ya yotses te majtan takʼin o teme ta schebal ya yotses.

 Maʼyuk jtuluk Testigo te ya yichʼ albeyel te jayeb takʼin ya yakʼe. Maba ya yakʼik te diezmo sok ma sujbilik ta yakʼel te jayeb takʼin ya staike (2 Corintios 9:7). Ta tsoblejetik kuʼuntik maba ya yichʼ kʼanel takʼin sok ma tojbiluk te ochibal. Te machʼatik yichʼojik yaʼtelik ta jreligiontik maba ya skʼanik stojolik teme ya yakʼik te ichʼ jaʼ, nujpunel, ay machʼa ya xlaj o yantikxan te bin ya yichʼ pasel. Maba ya jchontik weʼelil o yantik biluketik yuʼun ya jtatik takʼin. Maba ya jpastik tajimaletik jich bitʼil te lotería, rifa o yantik kʼinetik yuʼun ya jtatik takʼin sok maba ya jkʼanbeytik takʼin te ants winiketik. Maʼyuk bin-ora ya jpuktik ta albeyel sbiil te machʼatik ya yakʼik te majtan takʼine (Mateo 6:2-4). Ta página kuʼuntik ta Internet sok ta jpublicaciontik maʼyuk anuncioetik yuʼun jchonbajeletik tey-a.

 Ta jujun u, ta tsoblejetik yuʼun te Testigoetik ya yichʼ alel jayeb takʼin la yichʼ lajinel sok te jayeb takʼin jil ta congregación. Ay yorail te ya yichʼ ilel te jayeb takʼin ay yuʼunik, bin-utʼil la yichʼ lajinel sok teme lek yak ta tuuntesel (2 Corintios 8:20, 21).

•   Chʼin cajaetik yuʼun majtan takʼin: Ya xjuʼ ya awakʼ te atakʼin o cheque ta cajaetik te ayik ta sNail Tsoblej, sNail mukʼul Tsoblej o yantikxan te banti ya jtsob jbatik.

•   Majtan takʼin ta Internet: Ta bayal nacionetik ya xjuʼ ta tuuntesel te página ta Internet banti ya yal «Yakʼel majtan takʼin» yuʼun ya yichʼ akʼel te majtan takʼin ta tarjeta yuʼun crédito o débito, transferencia bancaria o yantikxan. b Ay Testigoetik ya skʼejik jtebuk stakʼinik ta jujun u yuʼun ya yakʼik ta majtan takʼin, jaʼ yuʼun ya spasik programar te jayeb ya yakʼik ta jujun ue (1 Corintios 16:2).

•   Majtan takʼin te chajpanbil skʼoplale: Ta wenta te yakʼel majtan takʼin te chajpanbil skʼoplale, kʼanbeya koltayel jtul licenciado yuʼun ya atuuntes ta lek te koltayel ay ta alumal o ta anacion. Ay machʼatik lek yilojik te nail ya sjojkʼoyik te bin-utʼil ta akʼel te majtan takʼin te ya xjuʼ ya yakʼik te kʼalal kuxulikto-a te jaʼto ya xkʼax ta skʼab-a te organización kʼalal ya laj te machʼa la yakʼe. Ya xjuʼ ya atsʼibay bael ta Betel te nopol ay ta alumal te bin-utʼil ta akʼel te majtan takʼin ta swenta te:

  •   cuenta ta banco

  •   seguros sok planes de jubilación

  •   naetik sok kʼinaletik

  •   acciones sok bonos

  •   testamentoetik sok fideicomisoetik

 Teme ya akʼan ya anaʼbeyxan skʼoplal te bin-utʼil ya awakʼ te majtan takʼin tey ta alumal, ochan ta página ta Internet banti ya yal «Yakʼel majtan takʼin».