Basa lathu la pa dziko lentse limbafambisidwa na bzakupereka bzaufulu bzakucitidwa maka-maka na wale omwe ni Mboni za Yahova. * Makaxa ya bzakupereka yambaikhidwa pa mbuto za mitsonkhano yathu, ndipo njira zinango za kucitira bzakupereka zimbagumanika pa webisaite yathu. Pa webisaitipo munthu angasankhule kucita bzakupereka kuti athandizire basa lathu la pa dziko lentse, bzakusaya bza m’gwere ayai bzentse bziwiribzi.

Munthu ali-wentse omwe ni Mboni lini ya Yahova angacitembo bzakupereka kuti athandize basa lathu. Mboni za Yahova zimbakumbira lini cakhumi, ayai kutcadja kobiri zomwe wanthu an’funika kupereka. (2 Wakolinto 9:7) Pa mitsonkhano yathu timbangingimiza lini wanthu kucita bzakupereka, ne anyakutsogolera wathu ambatcadja lini kobiri angabatiza munthu, angafotokoza nkhani ya nkhawa, nkhani ya malowozi ayai akacita mabasa yanango ya cipembedzo. Ifepano timbatenga lini kobiri za wanthu mwakuphatisa basa bzinthu ninga: kugulisa bzinthu mu gereja, xikola za kupfunzisa wanthu Bibliya, kucosa cikuta mwana, na bzinthu bzinango, ne timbakumbira lini wanthu kuti atithandize. Timbalewa lini madzina ya wale omwe ambapereka kobiri kuti athandize basa lathu. (Mateu 6:2-4) Ndipo mu webisaite zathu na mabukhu yathu timbaikha lini publicidade za magulu ya wale omwe ambathandizira basa lathu.

Ma gwere yentse ya Mboni za Yahova, yambapereka relatoriyo mwezi uli-wentse pa mitsonkhano yawo, kuuza wanthu wentse momwe kobiri zaphatisidwira basa pa mweziyo. Matsamba ya makonta ya gwere yambawonedwa kawiri-kawiri na cakulinga ca kutsimikizira kuti kobiri zikuphatisidwa basa bwino.—2 Wakolinto 8:20, 21.

• Makaxa ya bzakupereka: Mungaikhe kobiri ayai ceke m’makaxa ya bzakupereka yomwe yambagumanika mu Nyumba za Umambo, Nyumba Zakucitira Mitsonkhano Mikulu-mikulu ayai mbuto zinango zomwe timbacitira mitsonkhano yathu.

• Kucita bzakupereka na pa interneti: M’madziko mazinji mungaphatise basa mbali yakuti “Citani Cakupereka Kuti Muthandize Mboni za Yahova” kuti mucite bzakupereka mwakuphatisa basa cartão de crédito, cartão de Débito, transferências bancárias na njira zinango zakucitira bzakupereka mwakuphatisa basa interneti. * Mboni za Yahova zinango zimbasankhula ‘kukoyeratu ciri-centse pambali,’ mwezi uli-wentse mwa kucita ndondomeko ya kucita bzakupereka mwakuphatisa basa ibodzi mwa njira zimwezi.—1 Wakolinto 16:2.

• Bzakupereka bzakucita kukonzekera: Njira zinango zakucitira bzakupereka zimbafuna kukonzekera pakana nthawe na kuteweza malamulo. Kukonzekera kumweku kun’dzakuthandizani kucita cakupereka mwakusaya kukhoma mtsonkho. Wanthu azinji adagumana phindu thangwe ra kubvesesa momwe angacitire bzakupereka bzawo pomwe akana moyo ayai akadzafa. Taphata minyendo, penu mukufuna kucita cakupereka mwakuphatisa basa njira ziri m’nyantsizi bvunzani likulu la mboni za Yahova la dziko lanu:

  • konta ya ku banko

  • seguro na kobiri za reforma

  • nyumba

Kuti mudziwe njira zakucitira bzakupereka zomwe ziripo kwanuko onani mbali yakuti “Citani Cakupereka Kuti Muthandize Mboni za Yahova.”