Umulimo witu uwa mu nsi yonsinye wukakwavwilizwa ni mpiya zino Inte zya kwe Yehova wakayikundila ukusangula. a Pano tukalonganila pakawa utumbokosi umwakuwikamo imisangulo, swinya mungazana inzila nazinji zino mungawomvya pakusangula zino zikazanwa pa jw.org (Mulole pano pakuti: Imisangulo). Pawa inzila imvule izyakuwomvya nga cakuti wumwi akulonda ukusangula ku mulino wa nsi yonsinye, kwi wungwe nanti ukusangula kwi wungwe na ku mulimo wa nsi yonsi.

 Inte zya kwe Yehova wasifima icikumi swinya wasikwimika icipendo ca ndalama zinocila muntu azipizile ukusangwilako. (2 Wakorinte 9:7) Tusipisyamo imbale ya mutuulo swinya tusilipilisya wano wakakwiza mukulongana na sweswe. Swinya wano wakatungulula mwi wungwe wasilipilisya wantu pakuwabatizya, pakwavwilizya pa vililo, pa mawinga nanti pakulongana ukuli konsinye. Tusiya mukuwombela indalama, ndi vino ukuya mukuwombela mu vyalo vyawantu, swinya tusiya mukulenjelezya indalama nanti ukupaticizya awantu ukusangulako. Ivyewo vyonsinye pe wano wakasangulako avyankama, tusivisokolola kwe wanji pakuti wawamanye. (Mateyu 6:2-4) Tusizumilizya awantu ukutalika ukuwilizya amawukazi yawo ukuwomvya webusayiti yitu nanti pa mabuku yitu.

 Kukawa ukuwazya lipoti ya ndalama cila mwezi mu mawungwe yonsinye aya Nte zya kwe Yehova pakulongana kuno uwili wensinye angazanwako. Ivyewo vya ndalama zye cila liwungwe, wakavipitulukamo lyonsinye pakuti wasinincizye ukuti indalama awantu wakusangula zikuwomba ukulingana na vino zifwile ukuwomba.​—2 Wakorinte 8:20, 21.

•   Utumbokosi twa misangulo: Mungawika indalama nanti ama cheki mu tumbokosi twa misangulo tuno tukawa mu Mang’anda ya Wufumu, pa Vikulwa vya Kulonganilamo Ukulongana ku Kukulu, nanti pa vifulo vinji pano tukalonganila.

•   Ukusangula ukuwomvya intaneti: Munsi imvule nga mwaya pe webuayiti yitu iyakuti “Sangulaniko ku Nte zya kwe Yehova”, mungasangulako ukuwomvya kardi yino mukangongolelapo ivintu nanti e kardi ya ku banki, bank transfer ninzila zinji izya kusangulako ukuwomvya intaneti. b Wa Nte wamwi cila mwezi ‘wakapawulako vimwi’ amuno wawika icipendo cino wakasangulako cila mwezi ukuwomvya zimwi inzila pe zyo-o.​—1 Wakorinte 16:2.

•   Uwupe wuno mukalonda ukupa: Impindi zimwi mungatanticila lya nkani vino mukulonda ukusangulako. Ukutanticila lya nkani kungamyavwa ukunalipila imisonko imivule mu nsi muno mwawela. Ukumanya ivyewo pa vya wupe ivivule akuno kwavwa awavule ukumanya ivyawupe vino wangapa pano wacili awapuma nanti vino wangasya wapa pa nsizi ya mfwa yawo. Nga mukulonda ukpa uwupe ukuwomya inzila zino zyakonkapo, mukwai mungawuzya kwi ofesi lya musambo:

  •   akaunti ya ku banki

  •   Inshuwalansi

  •   Impanga ni vikulwa

  •   Nsonsela

  •   Ivyakusyala nanti ivya kusecezya

 Nga mukulonda ukumanyilapo na vinji pa nzila zino zyawela ku no mwikalila zino mungapelelamo uwupe, lolani icpande cakuti “Sangulaniko ku Nte zya kwe Yehova.”