In bʼant aqʼuntl quʼne tuʼnju onbʼil in tzaj kyqʼoʼn testigos de Jehová. a Qa at jun taj tuʼn ttzaj tqʼoʼn jun onbʼil, jaku kux tqʼoʼn toj tal tkubʼel onbʼil at toj ja jatumel in nok qchmon qibʼe. Ax ikx, jaku txi tqʼoʼn onbʼil ik tzeʼn in tzaj chikʼbʼaʼn toj jw.org jatumel in tzaj tqʼamaʼn, qe oyaj. Teyele junjun xjal kbʼel t-ximen qa taj tuʼn tonin tiʼj pwaq in bʼaj toj jun Ja te Chmabʼil, tiʼj aqʼuntl in bʼant twitz tkyaqil Txʼotxʼ moqa tiʼj kykabʼil.

 Mintiʼ in xi qʼamaʼn te jun testigo de Jehová jteʼ pwaq tuʼn t-xi tqʼoʼn te onbʼil. Mintiʼ in tzaj qanin qeye tuʼn t-xi qchjoʼne diezmo nix tuʼn t-xi qqʼoʼne pwaq tiʼjju in kambʼet quʼne (2 Corintios 9:7). Mintiʼ in jaw chmet pwaq jatumel in nok qchmon qibʼe ex nya chjoʼn tuʼn qokx. Ax ikx, mintiʼ in xi chjet twi kykʼuʼj nejenel aj kybautisarin erman kyuʼn, aj tex kyqʼoʼn chikʼbʼabʼil tiʼj jun erman otoq kyim, aj tex kyqʼoʼn chikʼbʼabʼil toj jun boda ex aj tbʼant junjuntl aqʼuntl kyuʼn. Mintiʼ in qo kʼayine wabʼj nix junjuntl tiʼchaq tuʼn tkambʼet pwaq quʼne. Ex mintiʼ in kubʼ qbʼinchaʼne qe saqchbʼil, ik tzeʼn lotería, rifa, qe ninqʼij ex junjuntl tiʼchaq tuʼn qkambʼane pwaq. Nya oʼkxju, ax ikx mintiʼ in xi qqanine kye xjal tuʼn ttzaj kyqʼoʼn pwaq qeye ex mintiʼ in xi qqʼamaʼne kybʼi xjal in tzaj kyqʼoʼn jun onbʼil (Mateo 6:2-4). Ex mintiʼ jun tqanil toj qtembʼile nix kyoj uʼj jatumel in tzaj tqʼamaʼn tuʼn t-xi chjet.

 Tkyaqil xjaw, in netz qʼamaʼn toj junjun congregación kye testigo de Jehová jteʼ pwaq in xi najsaʼn kyiʼj junjun tiʼchaq. Aj tikʼ junjun ambʼil, in tzaj qʼamaʼn kye kʼloj okslal tuʼn tajbʼen pwaq kyuʼn toj tumel (2 Corintios 8:20, 21).

•   Qe kaj tkubʼil pwaq: Jaku kux qqʼoʼn pwaq moqa cheque kyoj kaj ateʼ toj Ja te Chmabʼil, toj Ja te Nimaq Chmabʼil moqa kyoj junjuntl lugar jatumel in nok qchmon qibʼe.

•   Jaku txi samet pwaq toj Internet: Kyoj junjun tnam, jaku tzʼajbʼen tqanil tkubʼ toj plaj «Tuʼn t-xi qʼet oyaj kye testigos de Jehová» tuʼntzun t-xi samet pwaq aj tajbʼen tarjeta de crédito moqa débito, tuʼn t-xi qsamaʼn pwaq toj banco ex junjuntl tumel. b Ateʼ junjun testigo de Jehová in bʼaj kyprogramarin toj Internet tuʼn t-xi kyqʼoʼn chʼin pwaq te onbʼil junjun xjaw (1 Corintios 16:2).

•   Junjuntl tten tzeʼn jaku txi qqʼoʼn onbʼil: Tuʼn t-xi qʼet junjun onbʼil, at maj il tiʼj tuʼn t-xi qanit onbʼil te jun xjal at tojtzqibʼil tiʼj ley ex tuʼn tkyaj bʼant tiʼj tzeʼn kxel qʼet oyaj. Qa ma bʼant jlu tuʼna, jaku tzʼonin tiʼja tuʼn miʼn txi tchjoʼna nim impuesto ik tzeʼn in tzaj tqʼamaʼn ley toj ttnama. Ex tbʼanel o tzʼela kye junjun tuʼn tkyaj bʼant tiʼj kyuʼn tiʼ onbʼil kxel kyqʼoʼn, at maj in xi kyqʼoʼn akux itzʼ qe moqa ajxi kykyim. Jaku yolina kyukʼil erman ateʼ toj ninja qʼil twitz aqʼuntl kye testigos de Jehová tuʼntzun tok tbʼiʼna mas tqanil tiʼj tzeʼn jaku txi tqʼoʼna onbʼil:

  •   Cuentas bancarias

  •   Seguros y planes de jubilación

  •   Bienes raíces

  •   Acciones y bonos

  •   testamentos y fideicomisos

 Tuʼn tkanet mas tqanil tuʼna tiʼj tzeʼn tuʼn t-xi tqʼoʼna jun oyaj, jaku tzʼokxa jatumel in tzaj tqʼamaʼn «Tuʼn t-xi qʼet oyaj kye testigos de Jehová».