Mulimo wetu wakwambulula veji kuukundwiza kuhichila mumawana veji kuhananga mukulisakila kuli Vinjiho jaYehova. a Kuvihela vyakukungulukila tweji kuhakangako vikasha vyakuhakamo mawana, kaha jijila jikwavo jakuhanyinamo mawana vanajivuluka hakeyala yetu yahaInternet. Havikasha nahakeyala kana vasonekaho mangana mutu himutu ali nakusaka kuhana wana asakule kuhana wana wakukundwiza mulimo wamukaye kosena, chipwe wakukafwa chikungulwilo atwamamo, chipwe kumilimo yosena yivali.

 Vinjiho jaYehova kavavatomena jimbongo vatela kuhana, chipwe kufweta vyuma vyakusokesa mulikumiko. (Wavaka-Kolinde 2, 9:7) Liuka lyaVinjiho jaYehova kalyafwetesa vatu vaze veji kuyanga nakukunguluka, chipwe vaze navaya kulumbapachiso, chipwe kuchipeji, chipwe kuwenga, chipwe kukala kukungulukako. Kaha nawa liuka lyetu kalyasekasana chipwe kulombalomba chipwe kufwetesa vatu mangana liwaneko jimbongoko. Vatu vaze veji kuhananga wana katwavavilikako. (Mateu 6:2-4) Hakeyala yetu yahaInternet chipwe mumikanda yetu kavasonekamo kuvula chajimbongo vanakundwiza vatuko.

 Chikungulwilo hichikungulwilo chaVinjiho jaYehova cheji kuvilikanga mawana veji kutambulanga kakweji hikakweji. Kaha kweji kupwanga kuhituluka kuswa kumwe mujiakauti jachikungulwilo mangana vawane muvanazachishila jimbongo.—Wavaka-Kolinde 2, 8:20, 21.

•   Vikasha vyamawana: Munahase kuhaka jimbongo chipwe jicheki muvikasha vize vyeji kupwanga mujiZuvo jaWangana chipwe kujiZuvo jaKukunguluka Chachinene chipwe havihela vyeka haze heji kupwanga kukunguluka chetu.

•   Kuhana Wana haInternet: Mumafuchi amwe munahase kuhana wana hakuya hachihanda chahakeyala yetu yahaInternet chakwamba ngwavo “Donate to Jehovah’s Witnesses.” Kaha munahase kuhana wana kana kuzachisa chitupa vavuluka ngwavo credit card, nacha debit card, chipwe kunungulula jimbongo kufumisa muakauti yenu yakunyambaulu nakuhaka muakauti yaliuka chipwe kuzachisa kala jila. b Vinjiho jaYehova vamwe valitomena ‘kulamangako vimwe’ kakweji hikakweji mangana vahanenga kupwa wana kuzachisa jila yimwe hajijila tunavuluka.—Wavaka-Kolinde 1, 16:2.

•   Jijila jeka munahase kuhanyinamo wana: Jijila jimwe jakuhanyinamo mawana jasakiwa kuwahishila chimweza vyuma chipwe kukavangiza jishimbi jafulumende shimbu kanda muhane wana kuzachisa jila kana. Shikaho nge namuwahishila chimweza vyuma kaha nachimikafwa chikuma mwomwo fulumende yamulifuchi lyenu yinahase kumikeheselako mitelo. Vavavulu vananganyala mwomwo yakutachikiza kanawa mwakuhanyika wana shimbu vachili vavatonyi chipwe uze nalikatambula liuka nge vanafu. Shikaho kachi nge muli nakusaka kuhana wana kuzachisa jijila eji vanalave mwishi, kaha tuminenu kuofesi yamutango yaVinjiho jaYehova yamungalila yenu mangana vamilweze vyavivulu kutalisa kuvyuma vanavuluka mwishi:

  •   jiakauti jakunyambaulu

  •   ishuwalesi najimbongo jalitayamende

  •   vihela najizuvo

  •   chazano chajimbongo hakapani

  •   vyuma nashiki mutu kuhana nge nafu

Nge muli nakusaka mijimbu yayivulu yamwakuhanyina wana mungalila yenu kaha yenu hachihanda chakwamba ngwavo “Donate to Jehovah’s Witnesses.”