Sé gras a don moun ki Témwen Jéova an majorité, ki nou pé péyé travay-nou asou tout latè a. Adan sal réyinion-nou, i ni bwèt pou fè ofwann, men ni dòt monyen pou ba, kè ou pé touvé anlè paj-la Pou fè an don. Ni diféran lòpsion, pou sé moun-lan pé sa chwazi, swa soutienn travay-la asou tout latè, swa endé adan dépans an sanblé lokal, oben lé dé.

 Yo pa ka mandé Témwen Jéova péyé ladim, oben ba an sèten sòm lajan, oben an pouwsantaj adan lajan-an yo ka genyen (2 Korentjen 9:7). Adan sé réyinion nou-an, pani latjèt é lantré-a lib. Menm manniè, sé riprézantan tjilt nou-an pa ka mandé lajan pou batenm, lantèwman, mariyaj, épi sé lézòt sèwvis tjilt-la. Nou pa ka ranmasé lajan pa monyen vant gato, vant charité, kèrmès, fèt, lotri oben dòt bagay konsa, é nou pa ka mandé lajan. Enfòwmasion asou moun ki ka fè don pa janmen dévwalé, é moun pé pa wè yo (Matié 6:2-4). Asou sit Entèwnèt-nou é piblikasion-nou, pani piblisité ki ka pwodui lajan.

 Tout sanblé lokal ka fè an rapò finansié chak mwa pandan sé réyinion-an – éti tout moun pé vini. Yo ka kontwolé souvan dosié kontab chak sanblé, konsa, yo sav si yo ka sèvi lajan-an bienkòmifo (2 Korentjen 8:20, 21).

•   Bwèt pou fè ofwann : Nou pé fè an don, kisiswa épi lanmonné oben épi chèk adan sé bwèt-la pou fè ofwann ki adan sé Sal Wayòm-lan, sé Sal lasanblé-a, oben sé lézòt koté-a nou ka réyini.

•   Don asou sit-la : Adan an patjé péyi, nou pé sèvi paj-la « Fè an don pou sé Témwen Jéova-a » pou fè an ofwann pa kat krédi, pa kat débi, pa virman labank oben dòt monyen élèktwonik b. Yonn-dé Témwen ka désidé ‘mété an ti bagay asou koté’ chak mwa ; pou sa, yo ka pwogramé don ki régilié épi yonn di sé monyen-tala (1 Korentjen 16:2).

•   Don ki préparé alavans : Ni dé kalté don ki ka mandé an préparasion alavans épi/oben an konsèy jiridik. Gras a an préparasion alavans, ou pé ni bénéfis asou lenpo’w adan péyi’w. Anlo moun trapé avantaj pas yo mandé plis enfòwmasion asou don ki préparé alavans – kisiswa pandan yo an vi, oben apré yo mò. Si’w lé fè an don épi sé monyen-an ki ka suiv, ou pé mandé biwo nasional Témwen Jéova adan péyi’w plis enfòwmasion :

  •   kont labank

  •   kontra lasirans épi plan pou laritrèt

  •   kay épi téren

  •   aksion épi obligasion

  •   tèstaman épi bien ou ka kité ba an moun pou’y jéré

 Pou’w ni plis enfòwmasion asou sé diféran monyen-an pou fè don adan réjion’w, gadé paj-la « Fè an don pou sé Témwen Jéova-a ».