Mulimo wetu wa kwambujola hashi heswe, kakuukwasa ni milambu yize Yela ja Yehova akuhana. a Mishete twakusela milambu, kakuyisa mu yihela yize twakukungulukila. Majila akwo waze twakuhanyinamo milambu kakwasolola ha donate.pr418.com. Kuli majila anji waze mutu ni mutu mahasa kusakula hanga ahane milambu ya kukwasa mulimo wetu wa hashi heswe hanji kukwasa mu chikungulwila chize atwama.

 Yela ja Yehova keshi kuhana yihanda ya kumi hanji kuhana yihanda ya fweto yo. (2 A-Korindu 9:7) Kutushi kwita mbongo ha kukunguluka chetu, ha kupapachisa mutu, ha kulinga pande ja umbachiso hanji ha kukunguluka cheswacho. Kutushi kulinga mingoso hanga tupwe ni mbongo jinji hanji yiheho ya mbongo, nawa kutushi kushinjila atu ahane milambu. Kutushi kusoneka majina ja atu waze ahana milambu hanga atu eswe aanyingike. (Mateu 6:2-4) Site ni mikanda yetu kuyishi kusolola sango ja mingoso.

 Yikungulwila ya Yela ja Yehova hashi heswe, yakuhana lusango ha kukunguluka cho hakutwala ku chize azachisa mbongo hita kakweji. Mikanda yize akusoneka sango ja chize hita chikungulwila chakuzachisa mbongo ja milambu, kakuyihengwola hanga apwe ni shindakenyo ngwo milambu kayizachisa kanawa.—2 A-Korindu 8:20, 21.

•   Mishete ya milambu: Muhasa kuhana mulambu ha kusa mbongo mu mushete wa milambu mu Zuwo lia Wanangana, kuze twakulingila Kukunguluka cha Mbonge hanji ku yihela yikwo kuze twakukungulukila.

•   Kuhana milambu kupalikila ha internet: Mu yifuchi yimwe, atu mahasa kuhana milambu ha kuya ha chikuma “Milambu” hanga ahane milambu ha kuzachisa cartões de crédito, débito, transferências bancárias ni majila akwo nawa. b Yela ja Yehova amwe kakusa “chimwe kutenga” ha hita kakweji ahana milambu ha kuzachisa majila wano.—1 A-Korindu 16:2.

•   Milambu yakutesa: Majila amwe akuhanyinamo milambu ha internet kakufupiwa kulianga kulilulieka hanji kufupa ukwaso wa waze atala ha shimbi ja mu chifuchi. Kulinga chino, chakukwasa mutu ahone kufweta mbongo jinji ja lijimu mu chifuchi chenyi. Atu anji kayukile ha kunyingika kanawa chize mahasa kuhana yawana ya milambu muze achili ni mwono ni hanyima lia kufwa cho. Nyi mufupu kunyingika sango ja chize muhana milambu ha kuzachisa majila ngwe wano, lisesa, hanjika ni mandumbu ku mutango wa Yela ja Yehova mu chifuchi muze watwama:

  •   conta ya ku banco

  •   mbongo ja reforma

  •   kuhana zuwo hanji chihela

  •   kuhana ulite wa mbongo jize tukwete

  •   mukanda uze mutu akuhichika nyi hafwa

 Mba uwane sango jikwo hakutwala ku majila akuhanyinamo milambu ku chihela kuze watwama, tala chikuma “Milambu” ha site yetu.