Ina. Hi maKristo khu sighelo sesi si landreyago:

• Kholu hi zamago gu landrisa gwadi sihevbudzo ni mavbanyelo ya Jesu Kristo. — 1 Pedro 2:21.

• Kholu hi ngu khodwa gu khethu Jesu khuye litshina nya guvbanyiswe nya vathu, kholu “mafuni gwatshavbo limwalo limbe lina li riyidwego vathu li gu ni tshivba nya gu hi vbanyise.” — Mithumo 4:12.

• Tepo vathu va khalago Dzifakazi dza Jehovha, vo bhapatiswa linani la Jesu. — Matewu 28:18, 19.

• Kholu ha gu gombeya khu lina la Jesu. — Johane 15:16.

• Hi ngu khodwa gu khethu Jesu khuye Hungo, mwendro khuye a emisidwego gu ningwa wufumu nyo vbindre vathu vatshavbo. — 1 Vakorinto 11:3.

Hi hambanide ngudzu ni dzitshetshe nya dzingi dzi dzi embeyago gu khidzo khya wuKristo. Khu giyeyedzo, ethu ho khodwa gu khethu Bhibhiliya yari khiyo Jesu Gyanana gya Nungungulu; khari gipandre nya Vararu Moyo. (Marko 12:29) Kha hi khodwi gu khethu hefemulo nya muthu kha wufi, nigu kha hi khodwi gambe gu khethu Bhibhiliya yi ngu ganeya gu khiyo Nungungulu a ngu tshanisa mwendro gu vbisa vathu kala gupindruga niloni, mwendro gu khethu ava va thangeyago omu nya wukhongeyi gu vbwetega va ningwa sikhalo si va girago va wonega na vari vakhongolo guvbindra vambe. — Muhevbudzi 9:5; Ezekiyeli 18:4; Matewu 23:8-10.