¿xÑoptʼañob ba jiñi i testigojob Jehová?
Jiñʌchi. Ilayi mi caj i pʌstʌl chaʼan jiñobʌchi:
Mic chaʼlen lojon wersa chaʼan mic tsajcan lon majlel Jesucristo yicʼot chaʼan mic jacʼben lojon i cʌntesa tac (1 Pedro 2:21).
Mucʼʌch c ñop lojon chaʼan ñumen añʌch i cʼʌjñibal Jesús chaʼan miʼ mejlel c taj lojon j coltʌntel, come «maʼañic laj coltʌntel ti yambʌ, cojach tiʼ cʼabaʼ Jesús. Maʼañic yambʌ ti yebal panchan aqʼuebiloʼ bʌ wiñicob muʼ bʌ mejlel i coltañonla» (Hechos 4:12).
Cheʼ bʌ mi lon c sujtel ti i testigo Jehová, mi lon c chʼʌmjaʼ ti cʼabaʼ Jesús. (Mateo 28:18, 19).
Mi lon c mel oración tiʼ cʼabaʼ Jesús (Juan 15:16).
Mi lon c ñop chaʼan i jol pejtelel wiñic jiñʌch Jesús (1 Corintios 11:3).
Pero añʌch muʼ bʌ i yʌcʼon lojon ti cʌjñel tiʼ tojlel yambʌ poj xñoptʼan bʌ mi yʌlob i bʌ. Jumpʼejl ejemplo jiñʌch cheʼ tsaʼix cʼoti lon c ñaʼtan chaʼan jiñi Biblia mucʼʌch i pʌs chaʼan Jesús i yalobilʌch Dios i mach uxtiquilic Dios (Marcos 12:29). I maʼañic mi lon c ñop chaʼan jiñi Biblia miʼ pʌs chaʼan chʌn cuxulto miʼ cʌytʌl jiñi lac chʼujlel mi jiñic to chaʼan Dios mi’ yʌcʼ ti wocol o ti toj mulil ti cʼajc jiñi quixtañujob muʼ bʌ i chʌmelob, mi jiñic to mi lon c pʌs chaʼan ñumen ñucob i yeʼtel jiñi añoʼ bʌ ti ñopbalʌl tac (Eclesiastés 9:5; Ezequiel 18:4; Mateo 23:8-10).