Uzye Uwufumu wa kwe Leza Acani?

LIZYANI

Vino Baibolo Ikakwasuka Lyo-o Iwuzyo

Uwufumu wa kwe Leza awuteko wuno Yehova Leza wawikako. Mwe Baibolo “Uwufumu wa kwe Leza” wukakwitwa nu kuti “Uwufumu wa mwi yulu,” amuno akuno wukatecela. (Marko 1:14, 15; Mateyu 4:17, King James Version) Wawa wulyanye vino amawuteko ya wantu yawa, amulandu vye wa kuti amawuteko ya wantu yatanga yalingane nanti katici nu Wufumu wa kwe Leza.

Wakateka. E Leza wasonta Yesu ukuwa Amfumu ya Wufumu wa kwe Leza swinya wamupa na maka amukulu, swinya kusi e kateka uwili wensinye wino wapwapo ya-a amaka yano yapwa kwe Yesu. (Mateyu 28:18) E Yesu akawonvya amaka yakwe mukucita ivizima, amuno Antunguluzi yino tungasuwila swinya akalangulucilako. (Mateyu 4:23; Marko 1:40, 41; 6:31-34; Luka 7:11-17) E Yesu nawe wasola awantu ukufuma mu nko zyonsinye wano waliwa “awazyamfumu” ponga nawe mwi yulu.—Ukuwumbulika 5:9, 10.
Impindi Yino Wulileka Ukuteka. Uwufumu wa kwe Leza wutawa ndi vino amawuteko ya wantu yano yakawapo vye pa kampindi katici, apatalika ukuteka wanji, weni “wutalitela wononeke.”—Daniel 2:44.
Awatekwa. Wensinye angawa amutekwa, asa mulandu na kuno wakwatilwa, cikulu vye akucita ukulonda kwa kwe Leza.—Imilimo 10:34, 35.
Amasundo. Amasundo yano Uwufumu wa kwe Leza wawikako yasilesya vye awatekwa ukukanacita iviwipe, lelo yakalenga wawe awantu awazima. Ku cakulolelako e Baibolo ikati: “‘Uwakunda Imfumu e Leza wako nu mwezo wako wonsi, na mano yako yonsi.’ Lyonye lyo-o alili sundo kulu ukulusye yonsi, swinya alili lyakulemasya. Nalyo ilya chitiwili vyakolana: lyati, ‘Uwakunda umuwuyo ndi vino wayikunda.’” (Mateyu 22:37-39) Ukukunda Leza na wanji kukalenga awatekwa wa mwe wo-o Uwufumu wawika amano kwe vino wanji wakulonda.
Amasambililo. Nanti aca kuti Uwufumu wawicila awatekwa ivipimo vya papela, wukawasambilizya ni vya kucita pakufika pe vyo-o ivipimo.—Ayizeya 48:17, 18.
Cino Wawelako. Uwufumu wa kwe Leza utasintilila pa watekwa ukuti wavwilizye wakateka pa kuti wucite vino wukulonda. Lelo wulicita ukulonda kwa kwe Leza, ukusanzyako nu kuficilisya uwulayo wakulenga wano wakunda Leza ukwikala ku ciyayaya pano insi yiliwa Paradaise.—Ayizeya 35:1, 5, 6; Mateyu 6:10; Ukuwumbulika 21:1-4.