Pathian Ram chu Pathian Jehova din sawrkâr tak tak a ni a. Chu “Pathian ram” chuan vân aṭanga ro a rêl avângin, Bible chuan “vânram” tiin a sawi bawk. (Marka 1:14, 15; Matthaia 4:17) Mihring sawrkârte nêna inanna laite nei mah se, kawng eng kimah a chungnung zâwk a ni.

•   Rorêltute. Pathianin Isua Krista chu A Lalrama Lal atâna a ruat mai bâkah, mihring rorêltu tu mahin an neih theih ngai loh tûr thuneihna nasa tak a pe a ni. (Matthaia 28:18) Isua chuan Hruaitu rinchhan tlâk tak leh khawngaihna ngah tak a nihzia a lo lantîr tawh angin, a thuneihna chu thil ṭha tih nân chauh a hmang a. (Matthaia 4:23; Marka 1:40, 41; 6:31-34; Luka 7:11-17) Pathian kaihhruaina hnuaiah, Isua chuan vâna amah nêna lal nia ‘lei chunga rorêltu’ tûrte chu hnam tin zîng aṭangin a thlang a ni.—Thu Puan 5:9, 10.

•   A Rei Zâwng. Mihring sawrkâr inthlâk ṭhînte nêna inang lo takin, Pathian Ram chu “a chhe ngai ... lo vang.”—Daniela 2:44.

•   Khua Leh Tuite. An hnam leh an pianna hmun chu eng pawh ni se, Pathian duh zâwng titute chu Pathian Ram khua leh tui an ni thei ang.—Tirhkohte 10:34, 35.

•   Dânte. Pathian Ram dânte (a nih loh leh, thupêkte) chuan nungchang ṭha lote a khap mai piah lamah, a khua leh tuite chu nungchang lama tehna sâng zâwkte a zirtîr a ni. Entîr nân, Bible chuan: “‘Lalpa i Pathian chu i thinlung zawng zawngin, i thlarau zawng zawngin, i rilru zawng zawngin i hmangaih tûr a ni,’ tih hi. Chu chu thupêk ropui leh pawimawh ber a ni. Tin, a dawttu, a anpui chu hei hi a ni, ‘Nangmah i inhmangaih angin i vêngte pawh i hmangaih tûr a ni,’” tiin a sawi. (Matthaia 22:37-39) Pathian leh vêngte an hmangaihna chuan Pathian Ram khua leh tuite chu mi dangte tâna ṭha bertûr ngaihtuah reng chunga thil ti tûrin a chêttîr a ni.

•   Zirtîrna. Pathian Ram chuan a khua leh tuite tâna tehna sâng takte a siam rualin, chûng tehnate an tlin theih dân chu a zirtîr bawk.—Isaia 48:17, 18.

•   A Hlen Chhuah Tûr. Pathian Ram chuan a rorêltute chu a khua leh tuite hausakna a rinchhantîr lo vang a. Chu aiin, Pathian hmangaihtute chu lei paradis-ah chatuanin an nung ang tih thutiam pawh telin, Pathian duh zâwngte chu a tithleng famkim zâwk ang.—Isaia 35:1, 5, 6; Matthaia 6:10; Thu Puan 21:1-4.