“Hanu nji nako ya kubozekeza haansi mwiikalilo kuti saanzi uleti ahulu inkoondo. Hanu inako ya kuba ahulu ni buiswalo,” mwa wambila António Guterres, Mukulwana wee Nkopano ya Macaba (United Nations Secretary-General), habali kuwamba he ndaba ya Iran ya kutanga kulwiisa Isilayele kuba pangahali Lamugibelo, kali 13 April 2024.

 Inkoondo ikweete kulwiiwa mwa Middle East mutala wa ziintu zikweete kupangahala suunu mu cisi.

 “Mwe yiinu nako kwiina inkoondo ziingi zikweete kulwiiwa kuzamba inkoondo zicizibalwiwa kuzwa he Nkoondo ya Bubeli ya Cisi mi izi nkoondo ziamite bantu basika ha 2 bbiliyoni, aho kutalusa kuti, mu bantu beena 4 mu cisi umwiina uamitwe inkoondo.”—Impiho ya katengo ka United Nations Security Council, kali 26 January 2023.

 Zibaka mukweete kulwiiwa nji Isilayele, Gaza, Syria, Azerbaijan, Ukraine, Sudan, Ethiopia, Niger, Myanmar, ni Haiti. a

 Kulwa kakumane lili? Kana babusi be cisi bawoola kuleta inkozo? IBibele iwambanzi?

 Inkoondo zitubweene suunu mu cisi cisupo cokuti inkoondo mu cisi coonse ciziina hafwihi ni kumana. Izi nkoondo zizuzilikiza bupolofita bwa mwi Bibele kuamana ni nako ituhala. IBibele isumpa iyi nako kuba “mamanisilizo a mwiikalilo wee cisi.”—Matewu 24:3.

•   “Kamuzuwe zee nkoondo ni mpiho zee nkoondo. . . . Kakuti cicaba kacilwiise cicaba cimwi ni mubuso kawulwiise mubuso umwi.”—Matewu 24:6, 7.

 Mubale indaba yahe webbusaiti icokuti “What Is the Sign of ‘the Last Days,’ or ‘End Times’?” kuti mubone inkoondo zitubweene suunu muzizuzilikiza bupolofita bwa mwi Bibele.

 IBibele ipolofita za kumaniswa kwe nkoondo zoonse za bantu. Iyo ndaba kayipangahale bule? Insini ca buikatazo bwa bantu, kono ca Armagedoni, “inkoondo yee zuba ikaando lye Reeza wa Ziho Zoonse.” (Kuzikula 16:14, 16) Inkoondo ya Armagedoni ciyamana, Ireeza kezuzilikize insepiso yaakwe ku bantu ya kulikola buhalo kuya kwiile.—Samu 37:10, 11, 29.

 Kuti mulitute ziingi kaze nkoondo yee Reeza yeete imanise inkoondo zoonse, mubale indaba yahe webbusaiti icokuti “Ndwa ya Armagedoni ki nto Mañi?”