Motyasapalo 13 ya Tyikukutu yo 2024, o Irão yayumba omatenda ovilwa mo Israel, pahe omutumini w’Omalongo Aongana António Guterres, ati: “Pahe ou omuvo wokutula pohi omauta, wokwahavilisapo omalwei, omuvo wokulikondola omutima.”

 Ovilwa vikahi nokumoneka kovilongo vio-ko Médio Oriente, vilekesa umwe nawa okuti ouye wayemba kovilwa.

 “Nkhele kwakalele Ovilwa Viavali Viouye Auho, ovilongo vili nokulwa vialinga vali ovinyingi, ovanthu veli nokumona ononkhumbi vena onombiliau onombali, ngatyina uti — povathu vekwana wike — uli nokumona ononkhumbi.” — Tyapopiwa novo Conselho de Segurança das Nações Unidas, monthiki 26 ya Kupupu yo 2023.

 Ovilongo vili movilwa vili nokwipaa ovanthu ovievi: Israel, Gaza, Síria, Azerbaijão, Ucrânia, Sudão, Etiópia, Níger, Mianmar no Haiti. a

 Onalupi ovilwa mavipu? Okuti ovatumini mavaeta ombembwa? Oityi Ombimbiliya ipopia?

 Ovilwa vikahi nokumoneka mouye, vilekesa umwe nawa okuti apa katutu kamakukala vali ovilwa. Ovilwa ovio, vifwisapo etyi Ombimbiliya yapopile okuti matyimoneka momuvo uno tukahi. Ombimbiliya omuvo uno yeuti: ‘Omuvo wonthyulilo.’ — Mateusi 24:3.

•   “Mamukeiva ovilwa, nomatompho ovilwa. . . . Otyilongo matyikalwisa otyilongo otyikwavo, omauhamba maakalwisa omauhamba.” — Mateusi 24:6, 7.

 Tanga onthele yati: “Olipi Enyingilikilo “Liononthiki Mbonthyulilo,” ine “Onthyulilo Yononthiki”?” utale oñgeni etyi Ombimbiliya yapopile tyiyemba kovilwa tyikahi nokufwiswapo hono.

 Ombimbiliya yapopia okuti ovilwa kamavikala-ko vali. Mavikapwa-ko ñgeni? Havanthu-ko mavamane-ko ovilwa, mahi mavipu-ko mo Alumangendom, “ovilwa vionthiki onene ya Huku, Omuvili wa Atyiho.” (Eholololo 16:14, 16) Ovilwa ovio maviikula ondyila opo Huku afwisepo omphango yae yokweeta-ko ehambu nombembwa itwala-twalako. — Oviimbo 37:10, 11, 29.

 Opo unoñgonoke vali okuti ovilwa vya Huku mavimane-ko ovilwa viouye, tanga onthele yati: “Ovilwa Vyo Alumagedom, Oityi?”