“Luno hilwola lwakukehesako vikokojola. Luno hilwola lwakusolola muchima wakulikanyisa.” Mazu kana vawahanjikanga kuli António Guterres mukulwane waliuka lyaUnited Nations (Secretary-General) kutalisa kulifuchi lyaIran lize lyasanga mata amanene mulifuchi lyaIsrael lyaSateli, ha 13 April, 2024.

 Kulizungisa chili kumafuchi akuMiddle East chinapu chakutalilaho chimwe kaha havikokojola vyavivulu chili mukaye.

 “Mukaye muli vikokojola vyavivulu chikuma kufuma haze kwapwililile Jita yaKaye Yamuchivali kaha vatu jimbiliyoni jivali vali nakumona ukalu, kulumbununa nge mutu umwe havatu vawana ali nakumona ukalu mwomwo yavikokojola kana.”—United Nations Security Council, January 26, 2023.

 Kuvihela kuze kuli kulizungisa shina kuIsrael, naGaza, naSyria, naAzerbaijan, naUkraine, naSudan, naEthiopia, naNiger, naMyanmar, naHaiti. a

 Uno kulizungisa nachikakuma lwola muka? Uno vatwamina vamukaye vanahase kuneha kuunda tahi? Vyuma muka yahanjika Mbimbiliya?

 Vikokojola vili muno mukaye vili nakusolola nge kukuma chajijita josena chili hakamwihi. Eji jijita jili nakutesamo upolofweto wamuMbimbiliya uze wahanjika halwola tuli nakuyoyelamo. Mbimbiliya yavuluka lwola kana ngwayo, ‘chikukulwishi chakatwamino kamyaka yino.’—Mateu 24:3.

•   “Namukevwa jijita namijimbu yajijita. . . . “Lifuchi limwe nalikafumbukila lifuchi likwavo, kaha wangana umwe naukafumbukila wangana ukwavo.”—Mateu 24:6, 7.

 Tanga chihande chakwamba ngwavo “Vinjikizo Muka Vyasolola Nge Tuli Nakuyoyela ‘muMakumbi Akukuminyina’?” mangana umone omwo jijita jili mukaye jili nakutesamo upolofweto wamuMbimbiliya.

 Mbimbiliya yahanjikilile chimweza vyakukuma chavikokojola vali nakuneha vatu. Uno chuma kana nachikatesamo ngachilihi? Kacheshi kukatesamo mwomwo yakukilikita chavatuko, oloze kuhichila mujita yaAlamangetone, yize yapwa jita “yahalikumbi lyalinene lyaKalunga Wangolo Josena.” (Kusoloka 16:14, 16) Jita kana nayikalingisa Kalunga akatesemo lushiko ashika vatu lwakukavatwamisa mukuunda haya myaka.—Samu 37:10, 11, 29.

 Hakusaka kutachikiza vyavivulu hajita yaKalunga yize nayikakumisa jijita josena, tanga chihande chakwamba ngwavo “Uno Jita yaAlamangetone Yapwa Ika?”