António Guterres, Sekretari Pertubuhan Bangsa-Bangsa Bersatu madahka: “Tu meh maya iya situasi tu patut nyadi tenang agi sereta patut ngurangka konflik. Tu meh maya iya patut nagang diri.” Iya madahka tu pengudah Iran nyerang Israel kena Hari Enam, 13 April 2024.

 Perang ke nyadi ba Timur Tengah nya siti chunto utai ke benung nyadi ba serata dunya.

 “Diatu, bisi mayuh laya ti ganas ke ngujungka bebadi nyadi ba serata dunya. Penyampau laya tu mayuh agi kenyau ari Perang Dunya Kedua. Ketegal laya ke baka tu, 2 biliun orang, iya nya siku ari empat iku orang, ulih ngasaika empas iya.”—Majlis Keselamatan Pertubuhan Bangsa-Bangsa Bersatu, 26 Januari 2023.

 Menua ke bisi laya ke baka tu nyengkaum Israel, Gaza, Syria, Azerbaijan, Ukraine, Sudan, Ethiopia, Niger, Myanmar, sereta Haiti. a

 Kemaya perang deka ngetu? Ulih bala pemerintah mai pemaik? Nama utai ti dipadah Bup Kudus?

 Perang ke nyadi ba serata dunya nunjukka semua perang deka nadai agi enda lama da agi. Perang ke nyadi kemayaharitu ngamatka utai ke dipadah Bup Kudus pasal jeman kitai. Bup Kudus madahka, kitai benung idup ba “pengujung dunya tu.”—Matthew 24:3.

•   “Kita deka ninga munyi perang, enggau berita pasal perang ba mayuh endur bukai. . . . Bansa siti deka beperang ngelaban bansa siti, lalu perintah siti deka beperang ngelaban perintah siti.”—Matthew 24:6, 7.

 Bacha artikel “Nama Tanda ‘Hari ti Penudi’ tauka ‘Pengujung Dunya’?” kena nemu baka ni perang ke nyadi kemayaharitu ngamatka utai ke dipadah Bup Kudus.

 Bup Kudus madahka, perang deka nadai agi. Baka ni tu ulih nyadi? Utai tu deka nyadi nengah Perang Armagedon, “perang ke nyadi maya hari besai Petara ti Pemadu Bekuasa,” ukai nengah pengering mensia. (Pemandang 16:14, 16) Pengudah perang tu, Petara deka ngamatka semaya Iya ngambika mensia ulih idup enggau likun belama iya.—Masmur 37:10, 11, 29.

 Kena nemu mayuh agi pasal perang Petara ke deka ngujungka semua perang, bacha artikel “Nama Reti Perang Armagedon?”