Iran nih Israel a dohnak kong he aa tlaiin United Nations ah Secretary-General rian a ṭuanmi General António Guterres nih 2024, April 13, Zarhte Ni ah hitin a ti: “Atu hi ṭih a nungmi thil sining daihter caan a si. Mah le mah i uk khawh a herh caan zong a si.”

 Nichuah Laifang i raldohnak cu vawleicung pumpi ah a ummi raldohnak hna lakah pakhat lawng a si.

 “Vawlei Ralpi Pahnihnak in atu tiang ah a chuakmi raldohnak vialte nakin tuchan i raldohnak cu a voi a tam deuh. Mah nih mi pali ah pakhat asiloah mi nuai thong 2 a hnorsuan hna.”—2023, January 26, United Nations Security Council.

 Raldohnak a ummi hmun hna ah Israel, Gaza, Syria, Azerbaijan, Ukraine, Sudan, Ethiopia, Niger, Myanmar le Haiti aa tel. a

 Raldohnak cu zeitik ah dah a dongh lai? Vawlei hruaitu hna nih daihnak an umter kho lai maw? Baibal nih zeidah a chim?

 Tuchan vawlei ah a ummi raldohnak hna nih raldohnak vialte donghter a si lai caan a nai tuk cang ti kha an langhter. Mah raldohnak hna nih tuchan kong he aa tlaimi Baibal chimchungbia kha an tlinter. Baibal nih mah cu “chan donghnak” a si tiah a langhter.—Matthai 24:3.

•    “Lam nai le lam hla i raltuknak thawngpang kha nan theih lai. . . . Miphun pakhat le pakhat, ram khat le ram khat an i do lai.”—Matthai 24:6, 7.

 Tuchan i raldohnak nih Baibal chimchungbia a tlinter ning kong hngalh awkah “‘Ni Hmanung Bik’ Asiloah ‘Donghnak Caan’ Hmelchunhnak Hna Cu Zeidah An Si?” timi capar kha rel.

 Baibal nih raldohnak a dongh lainak kong kha a chimchung. Zeitindah a dongh lai? Minung ruang ah si loin Armageddon timi “Lianngan Bik Pathian ni lianngan ni” i raldohnak thawng in a si lai. (Biathlam 16:14, 16) Mah raldohnak hnuah Pathian nih minung caah daihnak a um zungzal lai timi a biakam kha a tlinter lai.—Salm 37:10, 11, 29.

 Raldohnak vialte a donghter dingmi Pathian raldohnak kong tam deuh in hngalh awkah “Armageddon Raldohnak Timi Cu Zeidah A Si?” timi capar kha rel.