“Ahora ya el tiempo para menora el tension. Ahora ya el tiempo para evita hace pa mas accion para gendeh queda mas grabe el situacion,” ya habla el Secretary-General del United Nations, si António Guterres, acerca na ataque del Iran na Israel del Sabado, Abril 13, 2024.

 El guerra na Middle East amo uno lang na maga guerra que ta sucede na entero mundo.

 “Desde na Guerra Mundial II, mas manada ya ahora ta sucede guerra na entero mundo y por causa con ese, ta sale afectao el 2 billon maga gente que 25 por ciento del entero populacion.”—Security Council del United Nations, Enero 26, 2023.

 El maga lugar que envuelto na maga guerra amo el Israel, Gaza, Syria, Azerbaijan, Ukraine, Sudan, Ethiopia, Niger, Myanmar y Haiti. a

 Hay llega ba el tiempo que nuay mas ya guerra? Puede ba dale paz el maga gobierno del gente? Cosa el Biblia ta habla?

 El maga gulu na entero mundo ahora ta indica que cerca ya termina con el todo guerra. Este maga guerra ta cumpli con el profecia acerca na diaton tiempo que ya llama el Biblia, “fin del mundo.”—Mateo 24:3, El Nuevo Testamento na Chavacano.

•   “Ay oi tamen ustedes . . . maga guerra y maga noticia de guerra. . . . Maga nacion ay man guerra contra otro maga nacion, y maga reino ay man guerra contra otro maga reino.”—Mateo 24:6, 7.

 Le con el articulo “Cosa el Señal del ‘Ultimo Maga Dia’ o ‘Tiempo del Fin’?” para mira si na cosa manera el maga guerra ahora ta cumpli con el profecia na Biblia.

 El Biblia ya predicta que hay termina con el maga gulu que ta sucede ahora. Paquemodo? Hay sucede se gendeh por medio na esfuerzo del maga gente sino por medio na Armagedon, el “guerra del Grande Dia del Dios todopoderoso.” (Revelacion 16:14, 16) Despues de ese guerra, el Dios hay cumpli con el de suyu promesa que dale le permanente paz na maga gente.—Salmo 37:10, 11, 29.

 Para aprende pa mas acerca na guerra del Dios que hay termina con el todo guerra, le con el articulo “Cosa el Guerra de Armagedon?”