Ateʼ nim xjal in kubʼ kyximen qa in bʼaj yajin twitz Txʼotxʼ kyuʼn txqantl, ex tuʼn jlu in tzaj bʼaj kykʼuʼj. In tzaj kyqʼamaʼn junjun xjal at kyojtzqibʼil tiʼjju in bʼaj tiʼj Txʼotxʼ qa in nok kybʼinchaʼn xjal nya bʼaʼn tiʼj ex tuʼn jlu jaku che kubʼ naj junjun clase txkup, tzeʼ ex junjuntl tiʼchaq.

 ¿Knajelpe Txʼotxʼ kyuʼn xjal? ¿Moqa kpol jun ambʼil jatumel jaku qo tzalaj twitz?

 In tzaj kyqʼamaʼn xjal at kyojtzqibʼil qa jaku tzʼok qxqʼuqin Txʼotxʼ ex qa jaku qo tzalaj twitz. Ex in tzaj kyqʼamaʼn junjun xjal in che jyon tqanil qa jaku tzʼok xqʼuqit Txʼotxʼ qa ma bʼant junjun chʼixpubʼil kyoj junjun lugar ex toj ax ambʼil. Kyxol qe chʼixpubʼil in kubʼ kyximen, ateʼ jlu:

•   Tuʼn tok qxqʼuqin Txʼotxʼ, qe tzeʼ, qe lugar jatumel at aʼ ex qe mar.

•   Tuʼn t-xi qjyoʼn junjun tumel tuʼn kyok awet awal ex tuʼn tten luz.

•   Tuʼn tbʼaj chʼixpet tumel alkye tten in che bʼaj bʼinchaʼn wabʼj ex tuʼn t-xi sipet, ex tuʼn miʼn tbʼaj kyyajin xjal nim wabʼj. Ax ikx, nim toklen tuʼn tok tilil kyuʼn tuʼn miʼn txi kychyoʼn nim chibʼj nix pescad, ex tuʼn t-xi kywaʼn mas verdura.

•   Tuʼn tel qnikʼ tiʼj qa nya oʼkx jaku ten tbʼanel qanqʼibʼil qa ma che ten nim tiʼchaq qe.

 ¿Tiʼ teya t-ximbʼetz tiʼj? ¿Jakupe tzʼok qeʼ qkʼuʼj tiʼj qa jaku che aqʼunan gobierno, qe empresa ex qe xjal junx maske naʼmx tbʼant jun maj kyuʼn? ¿Moqa in kubʼ t-ximana qa mlay bʼant tuʼnju oʼkx in che ximen xjal kyiʼjx, tuʼnju in jaw kynimen kyibʼ ex tuʼnju mintiʼ in nel kynikʼ kyiʼj junjun tiʼchaq? (2 Timoteo 3:1-5).

 In tzaj tqʼamaʼn Tyol Dios qa mlay kubʼ naj Txʼotxʼ kyuʼn xjal. Ex in tzaj tqʼamaʼn tiquʼn mlay bʼant jun tiʼ kyuʼn tuʼn miʼn tnaj Txʼotxʼ ex alkyeqe chʼixpubʼil il tiʼj tuʼn kybʼant. Ax ikx, in tzaj tqʼamaʼn tzeʼn che kbʼantel qe chʼixpubʼil lu.

 ¿Tiquʼn mlay tzʼonin aju in bʼant kyuʼn xjal tuʼn miʼn tnaj Txʼotxʼ? Kubʼ tbʼinchaʼn Jehová Txʼotxʼ ex xi tqʼoʼn ambʼil kye xjal tuʼn tok kyxqʼuqin (Génesis 1:28; 2:15). a Oʼkx jakutoq che tzalaj xjal qa ma txi kybʼiʼn tyol Jehová ex qe tkawbʼil (Proverbios 20:24). Noqtzun tuʼnj, mintiʼ bʼant jlu kyuʼn, sino el kypan kyibʼ tiʼj Jehová ex kubʼ kybʼinchaʼn aju mas bʼaʼn toj kywitz (Eclesiastés 7:29). Ex tuʼnju mlay bʼant kyxqʼuqin xjal tiʼj Txʼotxʼ kyjunalx, mintiʼ tipumal aju in bʼant kyuʼn ex mintiʼ in ten toj nim ambʼil (Proverbios 21:30; Jeremías 10:23).

 Aju chʼixpubʼil il tiʼj tuʼn tbʼant. Mlay txi tqʼoʼn Dios ambʼil tuʼn tnaj Txʼotxʼ kyuʼn xjal (Apocalipsis 11:18). Mintiʼ in ximen Dios tiʼj tzeʼn kʼokel kykawbʼil xjal te mas tbʼanel tuʼnju o tzʼok kybʼinchaʼn nim nya bʼaʼn tiʼj Txʼotxʼ. Aju kbʼantel tuʼn, kʼelel tiʼn kykawbʼil xjal ex kbʼel tqʼoʼn juntl kawbʼil te kyxel (Apocalipsis 21:1). Tuʼntzunju, in tzaj tqʼamaʼn Jehová jlu: «Tkyaqil kʼokel te akʼaj wuʼne» (Apocalipsis 21:5).

 ¿Tzeʼn kbʼantel chʼixpubʼil lu? Kbʼel tqʼoʼn Jehová Tkawbʼil te t-xel kykawbʼil xjal. A Jesús kʼokel te aj kawil toj Tkawbʼil Dios ex a kkawil tibʼaj Txʼotxʼ (Daniel 2:44; Mateo 6:10).

 Kxel tqʼoʼn Tkawbʼil Jehová xnaqʼtzbʼil kye xjal tuʼntzun kyanqʼin ik tzeʼn taj. Aj tel kynikʼ xjal tiʼj toklen Jehová tuʼn tkawin ex aj t-xi kynimen qe tley, kʼonil kyiʼj tuʼn tok kyxqʼuqin Txʼotxʼ ex tuʼn kytzalaj tiʼj (Isaías 11:9). In tzaj tqʼamaʼn Biblia qa ktel tbʼanel kyanqʼibʼil xjal tjaqʼ Tkawbʼil Dios, pero mlay tzʼok kybʼinchaʼn nya bʼaʼn tiʼj Txʼotxʼ. Aʼyetzun tiʼchaq lu kbʼantel tuʼn Tkawbʼil Dios:

•   Ktel kywa kykyaqil xjal (Salmo 72:16).

•   Kʼokel tkyaqil twitz Txʼotxʼ te akʼaj (Isaías 35:1, 2, 6, 7).

•   Kʼokel tilil tuʼn tuʼn tten tbʼanel kyanqʼibʼil xjal ex qe txkup (Isaías 11:6-8; Oseas 2:18).

•   Mlay txi tqʼoʼn ambʼil tuʼn ttzaj xitbʼil tuʼnx twitz Txʼotxʼ (Marcos 4:37-41).

 Jaku tzʼok qeʼ tkʼuʼja tiʼj qa kbʼantel tkyaqil chʼixpubʼil lu tuʼn Tkawbʼil Dios. Qa taja mas tqanil, jaku jaw tuʼjina xnaqʼtzbʼil «¿Jtoj kkawil Tkawbʼil Dios tibʼaj Txʼotxʼ?».