Be a ha bue sẹ yẹ bhi ọne iluemhin?

A dẹ bue sẹbhi uriagogo ọkpa.

Ejela a ha da lu ọle?

Nọọn Esali Jehova eji a ha da lu ọle bhi idunmhun nọnsẹ.

A dẹ be haosa nan rẹ nabhọ?

Eye.

A dẹ be ha si ọria igho bhi enin?

Eye. A isi ọria igho bhi ikolo soso ọsi Esali Jehova.

Ukpọn ikẹ be ribhọ nan ha yọ vae bhi enin?

Arẹmiẹn ukpọn ikẹ i ribhọ nan ha yọ vae bhi enin, Esali Jehova manman wo dọnmhegbe nin ele rẹ muegbe nọnsẹn beji Baibo tale. (1 Timothy 2:9) A bha re ọnin ta ghe, ukpọn nọn manman ghan, la ukpọn nan rẹ te egbe ọkpa uwẹ ha yọ.

Be da sunu bhi ọne Ayere?

Nan rẹ mun ọne ikolo hẹn, a dẹ so illo yẹ nan erọnmhọn. Ọkpa bhi ẹwẹ Esali Jehova ha nan ọne erọnmhọn. Illo bi erọnmhọn a ha yẹ rẹ kpẹn ọne ikolo. Emhin ọkpa kpataki nan ha lu bhi ọne Ayere hi, ọta nan ha rẹman. Bhi ọne ọta, a dẹ zilo nyan ebezẹle nin uyumhin nọnsi Jesu da yi emhin kpataki, bi ebi mhan ha rẹ miẹn elele yẹ bhi ebi Osẹnobulua bi Jesu Kristi lu nin mhan.

Nin uwẹ rẹ luẹ ba ọnan, tie ọne uhọnmhọn-ọta nọn yọle, “Bezẹle Nin Uwedẹ Nin Esali Jehova Rẹ Lu Ayere Ọsi Uyumhin Nọnsi Jesu Da Dikẹ Bhi Uwedẹ Nin Otuẹ Nekẹle Rẹ Lu Ọle?”

Ẹghela a ha rẹ lu Ayere ọsi uyumhin nọnsi Jesu bhi ikpe ne vade?

2025: Satọde, Epre 12

2026: Tọzde, Epre 2