Hina hi landza minawu ya Bibele mayelana ni ndlela leyi hi yendlaka hi yona Xilalelo xa Hosi, ku nga ku khumbuka Lifu la Yesu. (1 Vakorinto 11:20) Xilalelo lexi xi tiviwaka hintamu swaku i “Última Ceia” kumbe “Santa Ceia”. Kambe tikereke ta tinyingi ti yendla xilalelo lexi hi ndlela leyi kalaka yi nga fambisani ni leswi Bibele li swi djondzisaka.

 Ka Xilalelo xa Hosi hi khumbuka Yesu, ni ku tlangela gandzelo la nkutsulu leli a nga li nyikela hi ku va a hi felile. (Matewu 20:28; 1 Vakorinto 11:24) Xilalelo lexi a xi yendli swaku munhu a kota ku kombiwa timpsalu hi Xikwembu, kumbe ku rivaleliwa swidjoho swa yena. Kambe swi ngo rivaleliwa ntsena loko hi kombisa lipfumelo ka Yesu. — Varoma 3:25; 1 Yohani 2:1, 2.

 Yesu a byele vadjondzisiwa va yena swaku a va fanele va tlangela Xilalelo xa Hosi, kambe a nga va byelanga hi ku kongoma swaku a va fanele va xi yendla kangani. (Luka 22:19) Vanhu van’wani va pimisa swaku leswo a swi fanele swi yendliwa kan’we hi wheti kambe van’wani va pimisa swaku xi fanele xi yendliwa kan’we hi vhiki, siku ni siku kumbe makhambi ya manyingi hi siku, kasi van’wani va vula swaku munhu a nga tilangela swaku a ta xi yendla kangani Xilalelo xa Hosi. a Kambe ku ni swivangelo swin’wani leswi hi faneleke hi pimisa hi swona.

 Yesu a sungule Xilalelo xa Hosi ka siku leli Vayuda na vona a va tlangela Paxkwa, funtshi a tlhele a fa hi siku lolelo. (Matewu 26:1, 2) Phela leswo a swi yo kotlana. Bibele li fanisa gandzelo la Yesu ni gandzelo la Paxkwa la xinyempfana. (1 Vakorinto 5:7, 8) A Paxkwa a li yendliwa kan’we hi lembe. (Eksoda 12:1-6; Levhitika 23:5) Hilani ku fanaka, Vakreste va ku sungula a va tsundzuka lifu la Yesu kan’we hi lembe. Ninamuntlha Timboni ta Yehovha ti yendla leswi fanaka.

 Ndlela leyi Yesu a yendleke Xilalelo xa Hosi hi yona yi fanele yi hi pfuna ku tiva swaku xi fanele xi yendliwa kangaki, siku muni ni hi nkama muni. Yena a xi yendlile loko dlambu li pela hi diya 14 ka wheti ya Nisani, hi lembe la 33  E.C., hi ku ya hi kalendariyu leli a li tirhisiwa hi nkama wa ku tsaliwa ka Bibele. (Matewu 26:18-20, 26) Na hina hi tama hi tsundzuka lifu la yena kan’we hi lembe hi siku leli fanaka hi ku landza xikombiso xa Vakreste va ku sungula.

 Hambileswi diya 14 ka Nisani, wa lembe la 33 E.C., ku nga va Sexta-feira, ka makalendariyu ya hina, siku leli li nga wela ka siku lin’wani ni lin’wani hi ku ya hi lembe la kona. Se leswaku hi tiva swaku a 14 ka Nisani ku ta va siku muni, hi tirhisa makontelo lawa a ma tirhisiwa ka minkama ya Yesu, ku nga li kalendariyu la Xiyuda la swoswi. b

 Nkama Yesu a nga sungula Xilalelo xa Hosi, a tirhise pawu leli a li nga na fermentu ni vhinyu la ku pshuka leswi a swi salile ka Paxkwa. (Matewu 26:26-28) Na hina hi landza xikombiso xa yena, hi tirhisa pawu la ku kala li nga na fermentu kumbe swin’wani ni vhinyu la ku pshuka la ku kala li nga cheliwanga nchumu, ku nga li sumu la mawuvha kumbe vhinyu leli li nga cheliwa wulombe kumbe swin’wani.

 Tikereke ta tinyingi ti tirhisa pawu leli li nga ni fermentu, kambe ka Bibele a fermentu li nyimela xidjoho kumbe nchumu lexi wonhekaka. (Luka 12:1; 1 Vakorinto 5:6-8; Vagalatiya 5:7-9) Hi mhaka leyo, pawu ntsena leli kalaka li nga na fermentu kumbe swin’wani li nga tirhiseliwa swaku li fanisekela miri lowu wu kalaka wu nga na xidjoho wa Kreste. (1 Pedru 2:22) Xin’wani lexi Bibele li kalaka li nga xi seketeli i ku tirhisiwa ka sumu la mawuvha ku nga li vhinyu. Tikereke tin’wani ti yendla leswo hi leswi ti tsimbisaka ku phuza byala kambe ku tsimbisiwa koloko a ku na xisekelo xa Bibele. — 1 Timotiya 5:23.

 A pawu la ku kala fermentu ni vhinyu la ku pshuka leswi swi tirhisiwaka ka xitsundzuxu, swi fanekisela miri ni ngati ya Kreste. Swilo leswi a swi txintxi hi singita swi tipatsa ni miri ni ngati ya Yesu, ku nga leswi vanhu van’wani va swi pimisaka. Vona leswi Bibele li swi vulaka hi mhaka leyi.

•   Yesu a nga va byelanga vadjondzisiwa va yena swaku va phuza ngati ya yena, hikusa a a wu tiva nawu wa Xikwembu lowu a wu tsimbisa ku phuza ngati hikusa ngati ya kwetsima. (Genesa 9:4; Mintirho 15:28, 29) Se ha tiyiseka swaku Yesu a a nga ta byela vanhu swaku va tlula nawu wa Xikwembu. — Yohani 8:28, 29.

•   Phela vapostolo a va nga ta swi kota ku phuza ngati ya Yesu na a hanya, hikusa ngati ya yena a yi nga se “halatiwa” amisaveni. — Matewu 26:28.

•   Gandzelo la Yesu li yendliwe “kan’we ntsena.” (Vaheberu 9:25, 26) Loko pawu ni vhinyu leswi swi tirhisiwaka ka Xilalelo xa Hosi, a swi titxintxa swi va miri ni ngati ya Yesu, lava va dlaka Xilalelo a va ta phindhaphindha gandzelo la yena ku fana ni loko va tlhela va halata ngati ya yena.

•   Yesu a te: “Tshamelani ku yendla leswi leswaku mi ni khumbuka,” kambe a nga vulanga leswi “Tshamelani ku yendla leswi leswaku mi phindhaphindha gandzelo la mina.” — 1 Vakorinto 11:24.

 Vanhu van’wani lava pimisaka swaku a pawu ni vhinyu, swa txintxa swi va miri ni ngati ya Yesu va tirhisa tindzimana tin’wani ta Bibele. Hi xikombiso, Mabibele ya manyingi ma hundzuluxela marito ya Yesu lama nga ka Matewu 26:28, ma ku: “Leyi i ngati ya mina.” Kambe, marito lawa ma nga ha hundzuluxeliwa ma va: “Leswi swi fanekisela ngati ya mina,” kumbe “Leswi swi nyimela ngati ya mina.” c Ka ndzimana leyi Yesu a tirhise swifaniso, phela minkama ya yinyingi Yesu a a tirhisa swifaniso loko a djondzisa. — Matewu 13:34, 35.

 Loko Timboni ta Yehovha ti yendla Xilalelo xa Hosi, i vatsongo lava dlaka pawu ni ku phuza vhinyu. Hi mhaka muni?

 Ngati ya Yesu leyi yi nga halatiwa, yi yendle “ntwananu wa nyuwani” lexi xi nga pfaleta xipfumelelwani lexi Yehovha Xikwembu a nga xi yendla ni Israyele wa khale. (Vaheberu 8:10-13) Lava va patsiwaka ka ntwananu wa nyuwani, va dla pawu ni ku phuza vhinyu ka Xitsundzuxu. Kambe a hi Vakreste hinkwavu lava va dlaka pawu ni ku phuza vhinyu, kambe i vanhu vatsongo “lava va nga vitaniwa” hi Xikwembu hi ndlela ya ku hlawuleka. (Vaheberu 9:15; Luka 22:20) Vanhu volavo va ta fuma na Kreste atilweni, funtshi Bibele li vula swaku lava va nga ta va ni nkateku lelo i 144.000 wa vona. — Luka 22:28-30; Nhlawutelo 5:9, 10; 14:1, 3.

 Vanhu lava va nga ta fuma na Kreste va vitaniwa “ntlhambi wawutsongo” kambe vanyingi va hina, hi lumba “xitshungu xaxikulu” lexi xi nga ni ntshembo wa ku yamukela wutomi la ku kala li nga heli kola misaveni. (Luka 12:32; Nhlawutelo 7:9, 10) Lava va nga ni ntshembo wa ku hanya lani misaveni, a va dli pawu ni ku phuza vhinyu ka Xitsundzuxu kambe va kona swaku va kombisa ku tlangela gandzelo leli Yesu a nga va yendlela lona. — 1 Yohani 2:2.